नेकपा माओवादी केन्द्रका अध्यक्ष पुष्पकमल दाहालले केही दिनमै नयाँ सरकार गठन हुने बताएका छन्। उनले प्रधानमन्त्री केपी ओलीको सरकार धेरै दिन नरहने बताए।
शनिबार नेपाल निजामती कर्मचारी संगठनको चौथो केन्द्रीय परिषद भेलालाई सम्बोधन गर्दै दाहालले जनतालाई दु:ख नदिइकन, आन्दोलन नगरिकन नयाँ सरकार गठनको प्रयासमा आफूहरू रहेको बताए।
‘केही दिनभित्रै कालो बादल हट्छ,’ दाहालले भने, ‘यो प्रयास निरन्तर रुपमा अघि बढाइरहेका छौं।’
दाहालले देशलाई अप्राकृतिक रुपमा विखण्डित गर्ने प्रयास राष्ट्र र जनताकै लागि निकै पीडा भएको बताए।
उनले अहिले जबरजस्ती राज्यसत्ता कब्जा गर्ने अभियान चलेको पनि बताए।
‘जे आधिकारिक, संवैधानिक हो त्यसलाई निमोठिएको छ। यहीँबाट सबैचिजमा निकै ठूलो अन्योल र सन्त्रास छ,’ दाहालले भने।
उनले ७० प्रतिशत पार्टीको संसदीय संख्याले गरेको निर्णय संविधान र ऐन अनुकूल थियो भन्दै सेटिङमार्फत् आधिकारिकतालाई सरकारले खारेज गरेको बताए।
‘संसदीय दलको बहुमतले हस्ताक्षर गरेर केपी ओलीलाई दलको नेताबाट हटाएको थियो। संसद सचिवालयमा दर्ता गरिएको थियो। यो वैधानिक थियो,’ दाहालले भने, ‘तर, सरकारले सेटिङमार्फत आधिकारिकलाई खारेज गरिदियो। जे अवैधानिक र छलछाम छ त्यसलाई कायम गरिदियो।’
उनले हटाइसकेको प्रधानमन्त्री र पार्टी अध्यक्षलाई फेरि कायम राखिएको बताए।
‘यो निकै विचित्र भइरहेको छ। लोकतन्त्रको मूल्य मान्यता न्यूनतम् रुपमा पनि देखिएन,’ उनले भने, ‘सबै सेटिङ भयो, क-कसले गरेका छन् भन्ने हेर्नुभएकै होला। यस्तो बेला तपाईंहरूले न्याय पाउने, आत्मसम्मान र विधिपूर्वक वृत्ति विकास पाउन सक्नु हुन्न।’
उनले कर्मचारीलाई आतंकमा बाँच्न बाध्य पारिएको बताए। ‘सबै राज्यका अंगलाई सन्त्रासमा राखिएको छ। राज्यका सबै अंगमा जबरजस्ती कब्जा जमाउने षडयन्त्र भएको छ,’ दाहालले भने, ‘यो निकै ठूलो बिडम्बना हो।’
उनले पूर्वएमालेको भोट माओवादीलाई र पूर्वमाओवादीको भोट एमालेलाई परेको स्मरण गर्दै अहिले त्यो भोट छुट्याउन सकिन्छ भन्दै प्रश्न गरे।
‘दुनियाँमा यस्तो कहीँ हुन्छ? अब ती भोट हाल्ने मानिसलाई के भनेर परिभाषित गर्ने? तर, हाम्रो देशको अदालतले परिभाषित गरिदियो। माग्दै नमागेको कुरालाई परिपूर्ति गरिदियो,’ दाहालले भने।
