निर्वाचन आयोगले माधव नेपाल नेतृत्वको नेकपा (एकीकृत समाजवादी) र महन्थ ठाकुर नेतृत्वको लोकतान्त्रिक समाजवादी पार्टी दर्ताका लागि सनाखत गर्ने काम सम्पन्न भएको जनाएको छ।
निर्वाचन आयोगका प्रवक्ता राजकुमार श्रेष्ठले सञ्चारकर्मीहरूलाई प्रतिक्रिया दिँदै निर्वाचन नेकपा (एकीकृत समाजवादी) र लोकतान्त्रिक समाजवादी पार्टीका नेताहरूको सनाखत सकिएसँगै आयोग सचिवालय सनाखतको विवरणसहित आयोग सचिवालय प्रतिवेदन तयारी गरिरहेको जानकारी दिए।
प्रतिवेदन तयार भइसकेपछि दुवै दल दर्ताको सम्बन्धमा आजै निर्णय हुनसक्ने उनले बताए।
उनले भने, ‘नेकपा(एकीकृत समाजवादी) र लोकतान्त्रिक समाजवादी पार्टीको छुट्टै दल दर्ताका निम्ति भएको प्रक्रियाका अन्तर्गत आज दुवै दलका सदस्यहरूलाई हस्ताक्षर सनाखतका लागि आज आयोगले समय दिएको थियो। सनाखतको कार्य बिहान बिहान ११ः३० देखि २ बजेसम्म तोकिएको थियो। सनाखतको काम सम्पन्न भएको छ र उक्त काममा नेकपा(एकीकृत समाजवादी) का तर्फबाट केन्द्रीय सदस्यहरू ५५ जना र संघीय संसदका सदस्य ३० जनाले सनाखत गर्नुभएको छ। उक्त मध्ये ५४ जना केन्द्रीय सदस्य र ३० जना संघीय संसदका सदस्यले आयोगमा आफ्नो सनाखत गर्नुभएको छ भने एक जना सदस्यले नेपाली राजदूतावास नयाँ दिल्लीमा सनाखत गर्नुभएको अवस्था छ भने लोकतान्त्रिक समाजवादी पार्टीको तर्फबाट केन्द्रीय सदस्यहरू १६ जनाले हस्ताक्षर सनाखत गर्नुभएको छ भने संघीय संसद सदस्य १४ जनाले हस्ताक्षर सनाखत गर्नुभएको छ। सनाखतको विवरणसहित आयोग सचिवालयले प्रतिवेदन तयार गरेर आयोगमा पेश गर्ने काम चलिरहेको छ। र यस सन्दर्भमा अहिले कुनै निर्णय भइसकेको छैन। समय अभाव र अन्य कुनै कारणले रोकिएन भने निर्णय हुने सम्भावना छ। तर निश्चित भने भइसकेको छैन। आज निर्णय हुनपनि सक्छ। तर अब भ्याइन्छ, भ्याइँदैन काम भइरहेको छ। सकियो र अन्य कुनै कारणले रोकिनुपर्ने भएन भने निर्णय हुनसक्छ।’
उनले नेकपा(एकीकृत समाजवादी)मा ५५ जना केन्द्रीय सदस्य र ३० जना संघीय सांसदले सनाखत गरेको बताए। त्यस्तै, लोकतान्त्रिक समाजवादी पार्टीमा १६ जना केन्द्रीय सदस्य र १४ जना संघीय संसदले सनाखत गरेको पनि जानकारी दिए।
