असोज ७ गतेको लागि आह्वान गरिएको लुम्बिनी प्रदेशसभाको बैठक स्थगित गरिएको छ।
लुम्बिनी प्रदेशसभा सचिवालयले सूचना टाँसेर असोज १३ गते दिउँसो १ बजे बस्नेगरी बैठक स्थगित गरिएको जानकारी गराएको हो।
प्रदेश सभामा प्रमुख प्रतिपक्षी दल नेकपा एमालेको अवरोधका कारण गत भदौ १ गतेदेखि प्रदेश सभा बैठक बस्न सकेको छैन।
प्रदेश सभा सचिवालयका सचिव दुर्लभकुमार पुनले सूचना जारी गर्दै असोज १३ गतेसम्मका लागि बैठक स्थगित गरिएको उल्लेख छ।
नेकपा एमालेले कारबाही गरेका प्रदेशसभा सदस्यहरू अजय शाही र बिमला कुमारी खत्री वलीलाई पदमुक्त गरेको सदनलाई जानकारी गराउन माग गर्दै बैठक अवरूद्ध गर्दै आएको छ।
पार्टीले कारबाही गरेका दुई जना प्रदेशसभा सदस्यलाई पदमुक्त नगरेसम्म सदन चल्न नदिने एमालेको अडान छ।
