प्रभु साह नेकपा एमालेको विधान महाधिवेशनमा सहभागी नहुने भएका छन्। शुक्रबारदेखि ललितपुरको गोदावरीमा सुरू भएको एमाले विधान महाधिवेशनमा आफ्नो मागको विषयमा पार्टी नेतृत्वले वेवास्था गरेको भन्दै नेता साहले आफू सहभागी नहुने निर्णय लिएको सेतोपाटीलाई बताए।
'म विधान महाधिवेशनमा सहभागी हुँदिनँ,' साहले सेतोपाटीसँग भने, ' हिजो अन्तिम अवस्थामा पनि हाम्रो छलफल चलेको थियो। खासै कुरो टुंगोमा पुग्न सकेन। हतार हतारमा निष्कर्षमा पुग्न सकेनौं।'
तत्कालीन प्रधानमन्त्री केपी शर्मा ओलीले पुस ५ मा प्रतिनिधि सभा विघटन गरेपछि तत्कालीन नेकपा दुई पक्षमा विभाजित थियो। सुरुवातमा ओलीको कदमको विरोध गरेका साह पछि नेकपाको पुष्पकमल दाहाल ‘प्रचण्ड’ र माधव नेपाल पक्षसँग असन्तुष्ट भएका थिए। लगत्तै उनी ओली मन्त्रिपरिषद्को सदस्य बनेका थिए।
केही महिनायता उनले ओली नेतृत्वको एमालेलाई नेकपाको निरन्तरताको रुपमा लिनुपर्ने र त्यही अनुसारको नीति हुनुपर्ने बताउँदै आएका थिए।
‘जनताको जनवाद मान्ने कुरा भएको थियो। अहिले फेरि जनताको बहुदलीय जनवादमा फर्कने कुरा भएको छ। यो हामीलाई स्वीकार्य छैन। यसअघिको चुनावमा हामीले जनताको जनवादका लागि भोट मागेका थियौं’, उनले अगाडि भने,‘एमाले नेकपा बनेको दुई वटा धारबाट हो। एउटा एमालेबाट र माओवादीबाट एमाले र माओवादी पार्टी मिलेर बनिसकेको पार्टी फेरि २०७२ सालमा फर्कन कसरी मिल्छ?’
ओलीले मुखले स्वीकार गरे पनि व्यावहारिक रुपमा भने हिजोकै एमालेलाई निरन्तरता दिएको साहको बुझाइ छ। ओलीले आफूलाई दिएको बचनबाट पछि हट्दै धोका दिएको बुझाइमा साह छन्। एमालेमा असन्तुष्ट भएका उनले आईटी आर्मीका नाममा प्रदेश २ का जिल्लाहरुमा गतिविधि गर्दै आएका छन्।
