नेपाल समाजवादी पार्टी (नेसपा) का अध्यक्ष बाबुराम भट्टराईले नेकपा माओवादी केन्द्रका अध्यक्षसमेत रहेका प्रधानमन्त्री पुष्पकमल दाहाल 'प्रचण्ड' ले चुनाव जितेपछि पहिलेका प्रतिबद्धता भुलेको बताएका छन्।
नयाँ समाजवादी ध्रुवीकरणतर्फ जाने प्रतिबद्धता आएकोले २०७९ को चुनावमा माओवादी केन्द्रकै चुनाव चिह्नलाई साझा बनाएर जाने कुरा भएको स्मरण उनले गरे।
‘दुईभन्दा बढी दलले अलग-अलग पहिचानसहित भनेको थियो। पार्टी मिसाएको कहीँ भनिएको थिएन,’ काठमाडौंमा बुधबार भएको कार्यक्रममा बोल्दै भट्टराईले भने, ‘माओवादीमा जाने कहीँ भनिएको थिएन। तर पछि जब निर्वाचन भयो, खोलो तर्यो लौरी बिर्यौ। प्रचण्डजीले चुनाव जितिसकेपछि उहाँ त हिजो एउटा पानीमा भिजेको बिरालोजस्तो भएको मान्छे चुनाव जितिसके शेरजस्तो गर्जिन थाल्नुभयो।’
२०७९ मंसिरमा भएको चुनावमा प्रचण्ड गोरखा क्षेत्र नम्बर २ बाट प्रतिनिधि सभा सदस्य निर्वाचित भएका थिए। यो क्षेत्रमा भट्टराईले चुनाव लड्दै आएका थिए।
भट्टराईले प्रधानमन्त्री प्रचण्ड सत्ताका लागि जे पनि गर्ने आरोप लगाए।
भिडिओ:
