कर्णाली प्रदेश सरकारले विपदबाट नोक्सानी भोगेका प्रदेशका कृषकलाई क्षतिपूर्तीको व्यवस्था गर्ने भएको छ।
कर्णाली प्रदेश विपद् व्यवस्थापन परिषदको शुक्रबार बसेको बैठकले अन्नबालीमा भएको क्षतिको एकीन विवरण संकलन गरी कृषकलाई क्षतिपूर्तीको व्यवस्था मिलाउने निर्णय गरेको हो।
यस्तै विपतबाट पूर्ण रूपमा क्षति भएका घरको विवरण संकलन गरी संघीय र स्थानीय सरकारसँगको समन्वयमा पुनःनिर्माण गर्ने निर्णय पनि प्रदेश विपद् व्यवस्थापन परिषदले गरेको छ।
विपदका कारण क्षतिग्रस्त विद्यालय भवन र स्वास्थ्य चौकीका भवनको लगत संकलन गरी पुनःनिर्माणको व्यवस्था मिलाउने, बाढी, पहिरोलगायतको विपदमा परी मृत्यु भएकाका परिवारलाई प्रदेश सरकारले गरेको सामुहिक विपद दुर्घटना बिमाबाट प्राप्त हुने २ लाख रूपैयाँ तत्काल उपलब्ध गराउने निर्णय पनि परिषद्ले गरेको छ।
यस्तै विपदमा परि घाईते भएकाको उपचार खर्च पनि कर्णाली प्रदेश सरकारले व्यहोर्ने भएको छ।
विपदका कारण अवरूद्ध सडक, पुल, खानेपानी, सिचाइँ तथा विद्युत पूर्वाधारको मर्मतसम्भार गरी तत्काल सुचारू गर्ने निर्णय प्रदेश विपद् व्यवस्थापन परिषदले गरेको छ।