सर्वोच्च अदालतले मंसिर १५ गतेदेखि गोलाप्रथाबाट मुद्दाको पेसी तोक्ने निर्णय गरेको छ।
बिहीबार बसेको फुलकोर्ट बैठकले उक्त निर्णय गरेको एक न्यायाधीशले बताए।
यसअघि बुधबार सर्वोच्च अदालतका न्यायाधीशहरूले गोलाप्रथा प्रक्रिया लागु गर्न फुलकोर्ट डाक्न मुख्य रजिष्ट्रारलाई सन्देश पठाएका थिए।
अघिल्लो हप्ता फुलकोर्टले नै प्रधानन्यायाधीशले पेसी तोक्ने अधिकार कटौती गरी गोलाप्रथा लागु गर्ने गरी सर्वोच्च अदालत नियमावली पास गरेको थियो।
नियमावलीमा गोलाप्रथा लागु गर्ने मिति पनि फुलकोर्टले नै तय गर्नुपर्ने उल्लेख थियो।
गोलाप्रथाले पेसी तोकेपछि इजलास फर्किए पनि प्रधानन्यायाधीश चोलेन्द्र शमसेर राणासँग आफूहरूले इजलास सेयर नगर्ने न्यायाधीशहरूले बताएका छन्।
गोलाप्रथाबाट पेसी तोकेपछि प्रधानन्यायाधीशको पेसी तोक्ने अधिकार खोसिन्छ।
आजसम्म प्रधानन्यायाधीशले तोकेका इजलास नबस्ने निर्णय गरेका न्यायाधीशलाई पनि इजलास फर्किने बाटो खुल्छ।
सत्तासँग सौदाबाजी गरेको भन्दै सर्वोच्चका सबै न्यायाधीशले प्रधानन्यायाधीशसँग राजीनामा माग गरेका छन्। राजीनामा मागेपछि उनले तोकेका इजलास र उनीसँगको इजलास बहिष्कार गर्ने निर्णय गरेका थिए।
एक महिना अघिदेखि उनीहरूले प्रधानन्यायाधीशको राजीनामा माग गर्दै इजलास बहिष्कार गर्दै आएका छन्।