काठमाडौंका नवनिर्वाचित मेयर बालेन शाह शुक्रबार साँझ सिसडोल र बञ्चरेडाँडा पुगेका छन्। उनले त्यहाँ पुगेर अवस्था अवलोकन तथा जानकारी लिएको बञ्चरेडाँडा ल्यान्डफिल साइट सरोकार समितिका संयोजक श्रीराम ढुंगानाले जानकारी दिए।
उनका अनुसार नयाँ मेयर बालेन साँझतिर त्यहाँ पुगेका थिए।
'उहाँले यहाँको अवस्था अवलोकन गरी जानकारी लिनुभयो। हामीले उहाँलाई यहाँ भइरहेका विगतदेखिका कुराहरू बतायौं,' ढुंगानाले सेतोपाटीसँग भने, 'उहाँले यो समस्याको अन्तिम निकास के हुन सक्ला भन्नेबारे छलफल गरी सुझाव पनि माग्नुभयो।'
सिसडोल र बञ्चरेडाँडाका वरिपरिका बस्तीमा फोहोरका कारण सिर्जना भएका समस्या, स्थानीयको स्वास्थ्य र वातावरणमा परेको असर लगायतबारे विगतका सरकारले बारम्बार आश्वासन दिएको भए पनि पूरा हुन नसकेको उनले बताए।
'हामीले त्यसको परिपूर्ति गर्न उहाँसँग अनुरोध गरेका छौं। यहाँको फोहोरलाई आधुनिक र व्यवस्थित तरिकाले व्यवस्थापन गर्न भनेका छौं,' उनले भने, 'उहाँले चाँडै नै निरूपण गर्न छलफलमा बस्छु भन्नुभएको छ। सरकार र जनताले सधैं काठमाडौंको फोहोरबारे आन्दोलन गर्नुपरेको छ, यो अवस्था अन्त्य गर्न कसरी हुन्छ सकेसम्म चाँडो कस्तो कार्यक्रम ल्याउन सकिन्छ भनेर छलफलमा बसिहाल्छु भन्नुभएको छ।'
आफूहरूले वर्षौंदेखि आश्वासन मात्र पाइरहेको र कसैले काम नगरिदिएको गुनासो समितिले गरेको थियो। अब केही समयपछि पनि समस्या समाधान नभए फेरि आन्दोलन जारी राख्ने आफूहरूले बताएको ढुंगानाको भनाइ छ।
'हामीलाई सधैं आश्वासन मात्र दिइएको छ। अब केही दिनपछि पनि हाम्रो माग पूरा गर्ने प्रक्रिया सुरू नभए हाम्रो आन्दोलन निरन्तर रहन्छ,' उनले भने, 'उहाँले (बालेन) समस्या समाधानका लागि पहल गर्ने भन्नुभएको छ। उहाँले हाम्रो माग पूरा गर्नु हुन्छ भन्नेमा हामी आशावादी छौं। यसका लागि धेरै दिन कुर्न पर्दैन, दुई-चार दिनमा नीतिगत निर्णय नभए हामी फेरि जाने आन्दोलनमै हो।'
बालेनले यो समस्या काठमाडौं उपत्यका र ल्यान्डफिल साइट दुबैको भएकाले समाधानका लागि तत्काल पहल गर्ने बताएको ढुंगानाले बताए।
बिहीबार मात्र निर्वाचित मेयर बालेन शाहको पदभार ग्रहण बाँकी नै छ। यी प्रक्रिया सकेपछि तुरून्त कामकारबाहीमा लाग्ने उनले बताएका पनि ढुंगानाले जानकारी दिए।
