राष्ट्रिय प्रजातन्त्र पार्टी (राप्रपा) का अध्यक्ष राजेन्द्र लिङदेनले सरकारले ल्याएको आगामी आर्थिक वर्षको बजेट निर्वाचन केन्द्रित रहेको टिप्पणी गरेका छन्।
अध्यक्ष लिङदेनले ललिपपजस्तो मानिसलाई भूल्याउने गरी सरकारले आगामी आर्थिक वर्षको बजेट ल्याएको उल्लेख गर्दै त्यसप्रति आपत्ति जनाए।
बुधबार प्रतिनिधिसभा बैठकमा सरकारले ल्याएको आगामी आर्थिक वर्षको बजेटमाथिको छलफलमा भाग लिँदै उनले बजेटले चर्को मूल्यवृद्धि रोक्ने, मुलुकको आर्थिक संकट समाधान गर्ने कुनै प्रयास नगरेको दाबी गरे।
बजेटले जनताको जीवनमा परिवर्तन ल्याउने कुनै योजना प्रस्तुत गर्न नसकेको लिङदेनले गुनासो गरे। ‘बजेटको कुरा गर्दा अहिले मात्रै हामीले वितरणमुखि बजेट ल्याएको हो, अहिले मात्रै हामीले यस्तो बजेट ल्याएको हो? भनेर टार्ने र जवाफ दिने खालको आउँछ। यो हाम्रो लागि र हामी कसैको लागि पनि सुखद कुरा होईन’, उनले भने, ‘यो बजेटको जब हामीले कुरा गर्छौ अहिलेको बजेट इमान्दारीपूर्वक भन्नुपर्छ–कि यसले हाम्रो जीवनमा परिवर्तन गर्न सक्दैन। देशमा अहिले जुन प्रकारको आर्थिक संकट देखिदै गएको छ। जुन प्रकारको मूल्यवृद्धि देखिँदै गएको छ। त्यसलाई रोक्नेतर्फ यो बजेट उन्मुख छैन। यो बजेट केवल निर्वाचनलक्षित छ।’
अध्यक्ष लिङदेनले सरकारले ल्याएको बजेट स्रोतको एकीन नगरी अनुमानको भरमा आएको पनि बताए। उनले बजेटमा हेटौंडा कपडा उद्योग सञ्चालन गर्ने संयन्त्रको टुंगो नलगाई त्यसको कपडा प्रयोग गर्ने हावादारी कुरा गरिएको बताए।
‘यो बजेटको स्रोत के हो, यसको कार्यान्वयनका आधारहरु के हुन्? कहीँ पनि स्पष्ट छैन। यो सदाझै बजेट अनुमान, यति आम्दानी हुन्छ होला। अनि, यति अनुदान पाईन्छ होला, यति ऋण लिईन्छ होला त्यसको आधारमा चाँही बनाइएको छ। कति राम्रो कुरा छ कि–एकै घण्टामा चितवन पुग्ने। तर त्यसका आधार के हुन, स्रोत के हुन? यी सबैबाट के देखिन्छ भने यो बजेट एउटा ललिपपको रुपमा मानिसहरुलाई भुल्याउने गरी मात्रै ल्याइएको छ’, उनले भने, ‘हेटौंडा कपडा उद्योगबाट उत्पादित लुगाचाँही सबैले लगागनुपर्ने कति राम्रो कुरा जस्तो लाग्छ। आम मान्छेले सुन्दा कति राम्रो कुरा ल्यायो यो सरकारले भन्छ। उद्योग कहिले चल्ने हो, कहिले उत्पादन गर्ने हो ? उद्योग चलाउने संयन्त्र के हो ? थाहा छैन।’