नेकपा (एमाले) का सांसद ईश्वर पोखरेलले अमेरिकाद्वारा प्रस्तावित स्टेट पार्टनरसीप प्रोग्राम (एसपीपी) सम्झौता केपी ओली नेतृत्वको सरकारका पालामा अघि नबढाइएको दाबी गरेका छन्।
बिहीबारको प्रतिनिधि सभा बैठकमा समय माग गरी बोल्दै सांसद ईश्वर पोखरेले एसपीपी सम्झौता केपी ओली नेतृत्वको सरकारको पालामा अघि बढाइएको भनेर गलत कुरा सम्प्रेषण गरिएको जिकिर गरे।
उनले गठबन्धनले तथ्य विपरित र पूर्वाग्रहपूर्ण कुरा गरेको बताए। उनले एसपीपी प्रश्ताव नेपाल आउँदा नेपाली कांग्रेस नेतृत्वकै सरकार रहेको स्मरण गरे। पूर्व उपप्रधान तथा रक्षामन्त्रीसमेत रहेका सांसद पोखरेलले आफू मन्त्री रहँदा त्यस बारेमा कुनै पनि सकारात्मक कुरा गरेको केही लिखत, वक्तव्यहरु, माइन्युटहरु भए संसदमा प्रश्तुत गर्न चुनौती दिँदै त्यसको पूर्ण जवाफदेही लिन तयार रहेको बताए।
त्यतिखेर यो प्रस्तावको विषयमा कुरा आएको र आफूहरुले कार्यदल बनाएको स्मरण गर्दै उनले कार्यदलले सम्झौता अगाडि बढाउनु हुँदैन भन्ने निस्कर्ष निकालेपछि आफूहरूले कुनै प्रक्रिया अगाडि नबढाएको उनले स्पष्ट पारे।
‘जब केपी ओलीको बेलामा त्यो विषय उठ्यो, एसपपीलाई इन्डोप्यासिफिक ट्राटेजीको अंग बनाएर कुराहरू आइसकेपछि हामीले गम्भीर रूपमा लिनुपर्छ। यो हाम्रो असंलग्न परराष्ट्र नीति, कुनै सैनिक गठबन्धनमा सामेल नहुने हाम्रो अडान यसलाई कमजोर पार्ने हिसावले जुन कुरा आएको छ। यसको बारेमा हामीले जवाफ दिनुपर्छ भनेर त्यसबेला एउटा कार्यदल निर्माण गर्यौँ’, उनले भने, ‘त्यो कार्यदल परराष्ट्र सचिवको संयोजकत्वमा, रक्षासचिव, गृह सचिव र नेपाली सेनाका प्रतिनिधिसहित कार्यदल बन्यो। जसले एसपीपीको नाममा आएको यो चिजलाई अगाडि बढाउनु उचित हुँदैन भनेर निस्कर्षहरु निकालेको छ। यो तथ्य हुँदाहुँदै लाज पचाएर गलत ढंगले जुन ढंगले कुराहरु अहिले उछालिँदैछ। म यसप्रति खेद व्यक्त गर्न चाहन्छु।’
उनले गठबन्धनका नेताहरूले ओली नेतृत्वको सरकारलाई आरोप लगाएको भन्दै प्रमाण पेस गर्न चुनौती दिए। प्रमाण पेस गर्ननसके गैरजिम्मेवार अभिव्यक्तिको लागि क्षमा माग्नुपर्ने उनले बताए।
‘गठबन्धनका नेताहरु आज गलत ढंगले झुटो कुरा बोलिरहनुभएको छ। एमालेप्रति आक्षेप लगाउने काम मात्र गर्नुभएको छ। सन् २०१५ मा प्रधानमन्त्री सुशील कोईराला हुनुहुन्थो। रक्षा पनि। सन् २०१७ मा प्रधानमन्त्री शेरबहादुर देउवा हुनुहुन्थ्यो। त्यसबेला सकारात्मक प्रस्ताव पठाउनेहरू अहिले गलत कुराहरु बोलिरहनुभएको छ’, उनले भने, ‘एमालेप्रति संकेत गर्दै जुन आक्षेप लगाउनुभएको छ, म निन्दा गर्न चाहान्छु। भत्सर्ना गर्न चाहन्छु र चुनौतीकासाथ भन्न चाहन्छु।’
उनले अगाडि भने, ‘म केपी ओलीले नेतृत्व गरेको सरकारमा उपप्रधान तथा रक्षा मन्त्री थिएँ। यस विषयमा म पूर्ण जिम्मेवारीकासाथ भन्न चाहन्छु, यदि त्यस बेला कुनै पनि सकारात्मक कुरा, त्यसका केही लिखतहरू, वक्तव्यहरू, माइन्युटहरु छन् भने यो संसद समक्ष प्रश्तुत गरियोस्। त्यसको पूर्ण जवाफदेही लिन हामी तयार छौं।’