नेपाल बार एसोसिएसनले काठमाडौं जिल्ला अदालतका न्यायाधीश राजकुमार कोइराला र अधिवक्ता रूद्रप्रसाद पोखरेलबीचमा व्यवसायी इच्छाराज तामाङलाई धरौटीमा छुटाउनको लागि मोलमोलाइ गरिएको अडिओ समाचारमाथि छानबिन गर्न नियमनकारी निकायसँग माग गरेको छ।
महासचिव अन्जिता खनालले बुधबार विज्ञप्ति जारी गर्दै उक्त अडिओ समाचारमाथि नेपाल बारको ध्यानाकर्षण भएको भन्दै छानबिन गरी दोषीलाई कारबाही गर्न माग गरेकी छन्।
काठमाडौं जिल्ला अदालतका मा.न्यायाधीश राजकुमार कोइराला र अधिवक्ता रूद्रप्रसाद पोखरेलबीचमा ई. इच्छाराज तामाङलाई धरौटीमा छुटाउनको लागि मोलमोलाइ गरिएको अडिओ भनी मंगलबार न्यूज २४ मा प्रसारित अडिओ समाचारका सम्बन्धमा यस नेपाल बार एसोसिएसनको गम्भीर ध्यानाकर्षण भएको छ,’ बारको विज्ञप्तिमा भनिएको छ,’नागरिकको आस्था र धरोहरको अन्तिम केन्द्रको रूपमा रहेको न्यायपालिकाको साख श्रीवृद्धिमा मुख्य भूमिका निर्वाह गर्ने न्यायाधीश, कर्मचारी तथा कानून व्यवसायीहरूबाटै यस्ता किसिमका अवाञ्छित, अमर्यादित र अनुचित कार्यहरूको नेपाल बार एसोसिएसन घोर निन्दा गर्दछ।’
नेपाल बारले अघि भनेको छ- अतः उक्त सार्वजनिक भएको अडिओ समाचारका सम्बन्धमा सोको आधिकारिकता र सत्य–तथ्य व्यहोराको अनुसन्धान तथा छानबिन गरी उक्त कार्यमा कोही कसैको संलग्नता रहेको पाइएमा कसुरदारलाई कानूनी दायरामा ल्याउनका लागि यस नेपाल बार एसोसिएसन सम्बन्धित नियमनकारी निकायहरूसँग जोडदार माग गर्दछ।
काठमाडौं जिल्ला अदालतका न्यायाधीश राजकुमार कोइराला र अधिवक्ता रूद्र पोखरेलबीच ठगी मुद्दामा पक्राउ परेका व्यवसायी इच्छाराज तामाङलाई धरौटीमा रिहा गर्न दुई करोडको डिल भएको अडिओ मंगलबार सार्वजनिक भएको थियो।
न्यायाधीश राजकुमार कोइरालाले आफूबाट कुनै अनुचित कार्य नभएको बताएका छन्।
बुधबार दिउँसो फेसबुकमा स्टाटस लेखेर सञ्चारमाध्यममा आएको अडिओ र समाचारप्रति आफ्नो ध्यानाकर्षण भएको उल्लेख गर्दै उनले न्यायपरिषदले छानबिन गरे सहयोग गर्ने बताएका छन्।
‘मबारे आज आएका समाचारप्रति मेरो ध्यानाकर्षण भएको छ। मबाट कुनै अनुचित कार्य भएको छैन। विभिन्न प्रभाव र दबाबका बाबजुद निष्पक्ष भूमिका निर्वाह गरेको छ,’ कोइरालाले लेखेका छन्,‘ममाथि न्याय परिषदबाट छानबिन होस् तथा सहयोग गर्ने पूर्ण प्रतिबद्धता व्यक्त गर्दछु।’
