जनता समाजवादी पार्टी(जसपा)ले बारा क्षेत्र नं २ बाट पार्टी अध्यक्ष उपेन्द्र यादवको नाम सिफारिस गरेको छ।
जसपाको बारा जिल्ला कमिटीले यादवले चाहना राखेमा प्रतिनिधि सभाको लागि त्यहाँबाट उम्मेदवार बनाउन सिफारिस गरेको हो। यादवसँगै रामसहायप्रसाद यादव र प्रयाग राय वदको पनि नाम सिफारिस गरेको छ।
२०७४ को निर्वाचनमा बारा क्षेत्र नं २ बाट रामसहायप्रसाद यादव निर्वाचित भएका थिए।
‘अध्यक्षले चाहना राखे देशभरिबाट उठ्न समस्या छैन। बारा क्षेत्र नं २ बाट पनि उहाँको नाम सिफारिस भएको छ,’ जसपा सांसद रामसहायप्रसाद यादवले भने,‘कुन क्षेत्रबाट उम्मेदवार बन्ने भनेर पार्टीले निर्णय गर्छ।’
जसपा अध्यक्ष उपेन्द्र यादव २०७४ को निर्वाचनमा सप्तरी २ बाट निर्वाचित भएका थिए।
यादवले यस पटक पनि सप्तरी २ बाटै उठ्न चाहेका छन्।
