जनता समाजवादी पार्टीका अध्यक्ष उपेन्द्र यादवले एमालेसँगको सहकार्य निरन्तर अघि बढ्ने बताएका छन्।
सप्तरीमा उम्मेदवारी दर्तापछि सञ्चारकर्मीसँग कुरा गर्दै उनले यस्तो बताएका हुन्।
यादवलाई सञ्चारकर्मीले प्रतिनिधिसभा विघटनको घटनालाई प्रतिगमन भनेर अहिले एमालेसँगै तालमेल गर्नुको कारण सोधेका थिए।
त्यस प्रश्नको उत्तर दिँदै यादवले भने, ‘तपाईंले भनेको कुराले एमालेसँगको सहकार्यलाई छेक्दैन। राजनीतिक रूपमा दलका आ-आफ्ना विचारधारा छन्। त्यसमा सहमति/असहमति राख्न सकिन्छ। यो सिटको तालमेल हो। यसमा विगतको कुराले छेक्दैन। एमालेसँगको सहकार्य निरन्तर अघि बढ्छ।’
जनता समाजवादी पार्टीले एमाले अध्यक्ष केपी ओली नेतृत्वको सरकारले पहिलो र दोस्रो संसद विघटन गरेको घटनालाई प्रतिगमन भन्दै विरोध जनाएको थियो।
नागरिकता विधेयक पारित गर्न एमालेले असहयोग गरेको भन्दै उनले असन्तुष्टि समेत जनाएका थिए।
सप्तरीको समग्र विकासका लागि आफ्नो उम्मेदवारी रहेको यादवले बताएका छन्।
