नेपाली कांग्रेसका महामन्त्री गगन थापाले गत मंसिरको चुनावमा गठबन्धन गरेर त्यसलाई चुनावपछि निरन्तरता दिन नसकेकोमा जनतासँग क्षमा माग्नुपर्ने बताएका छन्।
प्रधानमन्त्री को बन्ने भन्नेमा कुरा नमिल्दा गठबन्धन भत्केको थियो। नेकपा माओवादी केन्द्रका अध्यक्ष पुष्पकमल दाहाल प्रचण्डले नेकपा एमालेलगायत दलसँग नयाँ गठबन्धन गर्दै सरकार गठन गरेका थिए।
‘के कारणले गर्दा त्यो गठबन्धन जोगाउन सकेका थिएनौं, हाम्रा बीचमा आरोप-प्रत्यारोप छ,’ काठमाडौंमा बुधबार भएको 'आजको नेपाली राजनीति र लोकतान्त्रिक संस्कारको सवाल' विषयक विचार गोष्ठीमा थापाले भने, ‘गठबन्धन जोगाउन नसकेकोमा कसैले मलाई भनिरहेका होलान्, मैले अरू कसैलाई भनिरहेको होला। चुनाव जित्यौं तर हाम्रा साथीहरू विस्मातको अवस्थामा हुनुहुन्छ।’
चुनावअघि पाँच वर्षका लागि गठबन्धन भनिएको उनले बताए।
‘चुनावका बेला लाखौं-लाख मतदातालाई गठबन्धनको भारी बोकाएर अहिले हामीले त्यसलाई जोगाउन नसक्दा त्यसबारे कि हामीले आत्मआलोचना गर्नुपर्यो, क्षमा माग्नुपर्यो वा त्यो निर्णय गलत थियो भन्नुपर्ला। यो प्रश्नबाट भागेर त हुन्न। कि पहिले अर्कै सोचिएको थियो अहिले अर्कै भयो भनेर स्वीकार गर्नुपर्यो,’ थापाले भने।
भिडिओ:
