राप्रपाका प्रवक्ता मोहन श्रेष्ठले केन्द्रीय कार्यसम्पादन समिति बैठकमा राष्ट्रपति चुनावबारे छलफल गरेर सहमतिमै निर्णय लिइने बताएका छन्।
आज दिउँसो १ बजे धुम्बाराहीमा बस्ने कार्यसम्पादन समिति बैठकबाट वृहत छलफल गरेर आवश्यक निर्णयमा पुगिने श्रेष्ठले बताए। राप्रपाले राष्ट्रपति चुनावमा कसलाई सहयोग गर्नेबारे निर्णय लिइसकेको छैन।
फागुन १३ मा नेपाली कांग्रेसका नेता रामचन्द्र पौडेल र नेकपा एमालेका नेता सुवास नेम्वाङले मनोनयन दर्ता गर्दा राप्रपा कुनै पनि उम्मेदवारको प्रस्तावक र समर्थक बसेको थिएन।
‘हामी अनेक आरोह अवरोह पार गर्दै ३३ वर्षे इतिहास भएको पार्टीका सदस्य हौं, ३३ दिनमा नेता हुने रहर गर्नेहरूको कुरा सुनेर आफूलाई बदल्ने भुल नगरौं,’ श्रेष्ठले कार्यसम्पादन बैठकअघि भनेका छन्।
पार्टीले कुनै पनि विषयमा निर्णय गर्दा कार्यकर्ता र शुभेच्छुकको भावना प्रतिविम्बित गर्ने गरेको उनले बताए।
‘तर यसो गरिए खबरदार, उसो गरिए बर्बाद हुन्छ भन्नेजस्तो अभिव्यक्ति जिम्मेवार निकायमा रहेका साथीहरूबाट यदाकदा आउने गरेको छ,’ उनले भने।
बैठकमा भोलि हुने राष्ट्रपति निर्वाचनबारे पनि छलफल हुने उनले बताए।
‘राष्ट्रपति निर्वाचनका सन्दर्भमा विभिन्न कोणबाट आएका सुझाव हाम्रो नोटिसमा छन्,’ उनले भने, ‘राजनीतिक दलले कार्यकर्ताको भावना र जनभावना अनुरुप आफूलाई गतिशील बनाउने हो। सबैलाई थाहै छ, कुनै निर्णय गर्दा राप्रपाले वृहत छलफल गरेर निर्णय गर्ने गरेको छ, यसपटक पनि त्यसै गर्छ, सुझबुझपूर्ण निर्णय गर्छ।’
उनले केही मानिसहरू राप्रपाजस्तो विचार बोके पनि राप्रपाका लागि प्रतिपक्षीजस्ता देखिने आरोप उनको छ।
‘एकाथरि मान्छेहरु राप्रपाको जस्तै विचार बोक्छन्, बोल्छन् तर राप्रपाका लागि सधैंको प्रतिपक्षी जस्ता देखिन्छन्। संगठित रुपमा राप्रपालाई अर्ती उपदेश दिन्छन्, भए नभएको प्रचार, दुष्प्रचार गर्छन्, आवश्यक परे तल्लो स्तरको टिप्पणी पनि गर्छन्, चुनावको बेला तिनले राप्रपालाई होइन कांग्रेस र कम्युनिस्टलाई भोट दिन्छन् भन्ने हाम्रो आरोप छ,’ उनले भने।
केही राजावादीले भने आफैं उमेदवार बनेर राप्रपाका उमेदवारलाई हराइदिएको श्रेष्ठको भनाइ छ।
‘हिन्दुराष्ट्र र राजसंस्थाको मुद्दा लिएर राजनीतिक समूह बनाएका, आफ्नै उमेदवार खडा नगरेका १०० भन्दा बढी दल र समूहले गएको निर्वाचनमा कहाँ भोट हाले? एजेन्डाको पक्षमा मतदान गर्नु हुनेहरु प्रति भने हार्दिक नमन छ,’ उनले भने, ‘आफूलाई राम्रो बनाउने र आफ्नो अभियान सञ्चालन गर्ने क्रममा अर्कोलाई दोषी देखाउने प्रवृत्ति राष्ट्रवादी आन्दोलनको सबैभन्दा कमजोर पक्ष हो। निशाना बनाउनुपर्नेहरु अरु नै छन् तर लामो इतिहास भएको, समान विचार बोकेको, यहि एजेन्डा लिएर निर्वाचनमार्फत वैधानिक रुपमा स्थापित भएको, संसदको पाँचौ र यो एजेन्डाको प्रमुख शक्ति राप्रपालाई किन निशाना बनाइँदैछ?’