राष्ट्रिय प्रजातन्त्र पार्टीका अध्यक्ष राजेन्द्रप्रसाद लिङदेनले प्रधानमन्त्री पुष्पकमल दाहाल ‘प्रचण्ड’ प्रति व्यंग्य गर्दै पुरानो गाडी चलाउन ड्राइभर फर्किएपछि आफूले सत्ताबाट बाहिरिनुपरेको बताएका छन्।
सोमबार प्रतिनिधि सभाको बैठकमा बोल्दै उनले यस्तो व्यंग्य गरेका हुन्। उनले नयाँ गाडी दिँदादिँदै पनि ड्राइभर पुरानो गाडीमा फर्किएपछि आफू बाध्य भएर सरकारबाट छुट्नुपरेको बताए।
प्रधानमन्त्री दाहालले धोका दिएपछि आफू सरकारबाट बाहिरिएको र यसमा इतिहासले मूल्यांकन गर्ने लिङ्देनको भनाइ छ। हाइड्रोजन गाडी दिँदैदिँदै प्रधानमन्त्री थोत्रा गाडीमा फर्किएको उनको तर्क थियो।
‘हामीले त लाइसेन्स प्राप्त ड्राइभरलाई गाडी चलाउन दिएका थियौं। तर उहाँ स्टार्ट गर्न नपाउँदै पुरानै गाडी चलाउँछु भनेर झर्नुभयो। त्यसपछि हामी सरकारमा बसिरहन सकेनौं। समर्थन फिर्ता लियौं। तर उहाँले धोका दिनुभयो। यो मुलुकमा नैतिकता पनि हुन्छ भनेर हामीले देखायौं। प्रधानमन्त्री दिइरहेको गाडी छोडेर भाग्नुभयो,’ लिङ्देनले भने।
अध्यक्ष लिङदेनले प्रधानमन्त्री प्रचण्डलाई विश्वासको मत नदिने पनि बताए।