ललितपुर महानगरपालिकाले पर्यटकका लागि विद्युतीय बस ल्याउने योजना बनाएको छ। यसका लागि सम्भाव्यता अध्ययन सुरु गरिसकेको महानगरका प्रवक्ता राजु महर्जनले जानकारी दिए।
ललितपुर आउने पर्यटकलाई सहज रुपमा घुम्ने व्यवस्था मिलाउन सम्भाव्यता अध्ययन सुरू गरिएको उनको भनाइ छ।
‘पर्यटकसँग घुम्ने समय थोरै हुन्छ। कोही वृद्धवृद्धा र बालबालिक पनि हुन्छन्। उहाँहरुलाई सहज होस् भनेर हामीले विद्युतीय बसको अध्ययन थालेका हौं, प्रवक्ता महर्जनले भने, ‘यसले छोटो दूरीमा पनि ट्याक्सीमै जानुपर्ने र महँगो शुल्क तिर्नुपर्ने बाध्यता हुँदैन।'
महानगरका भित्री भागमा रहेका पर्यटकीय गन्तव्यमा पुग्न बस सञ्चालनमा ल्याउन लागिएको हो। बस पर्यटकको मागअनुसारका क्षेत्रमा चलाइने उनले जानकारी दिए। मागअनुसार खोकना, बुङमतीसम्म पनि जान सक्नेछ।
प्रवक्ता महर्जनका अनुसार सम्भाव्यता प्रतिवेदन आएपछि टेन्डर आह्वान गरेर अर्को आर्थिक वर्षबाट बस सञ्चालन गर्ने योजना छ।
‘रिपोर्ट आउने वित्तिकै हामी टेन्डर आह्वान गर्छौं। सकेसम्म राम्रो कम्पनीबाट बस ल्याउनेछौं। अर्को आर्थिक वर्षबाट बस चलाउने योजना हो,’ उनले भने।
अध्ययन प्रतिवेदनपछि बसको संख्या पनि तोकिनेछ। महानगरले विद्युतीय बस चलाउन यो आर्थिक वर्षमा पाँच करोड बजेट छुट्याएको छ।
