महानगरीय अपराध महाशाखाका एसएसपी र काठमाडौं प्रहरी प्रमुख एसएसपीले संयुक्त रुपमा पहिलो पटक पत्रकार सम्मेलन गरेका छन् ।
भर्खरै सरुवा भएर आएका महानगरीय अपराध महाशाखाका एसएसपी सहकुल बहादुर थापा र काठमाडौं प्रहरी प्रमुख उत्तम सुवेदीले संयुक्त रुपमा पत्रकार सम्मेलन गर्दे आफ्ना भावी योजनाहरु सुनाएका हुन् ।
यसभन्दा अघि महाशाखा र काठमाडौं प्रहरी प्रमुखबीच राम्रोसँग समन्वय हुन सकिरहेको थिए।
विगतका कुराहरुलाई ध्यानमा राखेर अपराध विरुद्ध मिलेर काम गर्ने सन्देश दिन पहिलो पटक पत्रकार सम्मेलन गरिएको काठमाडौं प्रहरी प्रमुख एसएसपी सुवेदीले जानकारी दिए।
एउटै लक्ष्य, एउटै कार्यविधि र योजनाहरु साझा रहेकाले दुबै संस्था मिलेर काम गर्न लागिएको महाशाखाका एसएसपी थापाले बताए।
दुबै जना एसएसपीहरुले संठगित रुपमा भइरहेको गुन्डागर्दी नियन्त्रण, आर्थिक अपराध, साइबर क्राइम मुख्य चुनौतिका रुपमा देखिएको बताए।
महाशाखा प्रमुख थापाले अपराधमा गुन्डाहरु मिलेर काम गर्न सक्ने त्यस नियन्त्रण गर्न हामी मिलेर काम गर्न किन नसक्ने भन्दै प्रश्न समेत गरे।
पत्रकार सम्मेलनमा दुबै जना एसएसपीले यो कार्ययोजना लामो समय सम्म टिकाउने दाबी समेत गरे।
'दुबै संस्था नमिल्दा कतिपय अप्रेसन गर्न कठिनाइ भइरहेको थियो,' महाशाखाका एसएसपी थापाले भने, 'अब कुनै अप्रेसन गर्नुपर्दा छिटो गर्न र कसले नेतृत्व गर्ने भन्ने टुंगो लाग्न पनि समय लाग्दैन।'
महाशाखाका प्रमुख थापा र काठमाडौं प्रहरी प्रमुख सुवेदी एउटै ब्याची समेत हुन् ।