खोटाङका एक महिला र पुरुषले आज बिहान काठमाडौं महानगरपालिका–८ गौशालास्थित भण्डारखालको जंगलमा आत्महत्या गरेका छन्।
खोटाङको दित्तेल रूपाकोट मझुवागढी नगरपालिका–१० घर भई काठमाडौंको बाँसबारी बस्दै आएका ४० वर्षीय जय गिरी र खोटाङको टेम्मा गाउँ बस्ने ३३ वर्षीया उमिता दमाइ आज बिहान सँगै रूखमा झुण्डिएको अवस्थामा फेला परेको महानगरीय प्रहरी वृत्त गौशालाका प्रहरी निरीक्षक खेम राउतले जानकारी दिए।
बिहान भ्रमणमा निस्किएका स्थानीयवासीले दिएको सूचनाका आधारमा घटनास्थल पुग्दा उनीहरू झुण्डिएको अवस्थामा मृत फेला परेको गौशाला प्रहरीले जनाएको छ।
प्रहरी निरीक्षक राउतले चिकित्सक बोलाएरै घटनास्थलको प्रकृति मुचुल्का उठाई दुवै शव परीक्षणका लागि महाराजगञ्जस्थित शिक्षण अस्पतालमा लगिएको जानकारी दिए।
उनीहरू दुवै जना खोटाङ कारागार बसेर निस्किएको बुझिएको छ।
बाँसबारीमा परिवारसँगै बस्दै आएका गिरी मजदूरी गर्दथे। आज बिहान उनकी श्रीमती र छोरा प्रहरीको सम्पर्कमा आएका थिए। गिरी सोमबार बेलुका पशुपति घुम्न जान्छु भनेर निस्किएको श्रीमतीको भनाइ उद्धृत गर्दै प्रहरी निरीक्षक राउतले बताए।
खोटाङ बस्दै आएकी दमाइ काठमाडौं आएको कारण भने खुलेको छैन। उनी काठमाडौंमा दिदी-भिनाजुकहाँ बसेको पाइएको प्रहरीले जनाएको छ।
