खुलामञ्चको ढलान कार्य अभियन्ताहरूले बन्द गराएका छन्।
काठमाडौं महानगरपालिकाले दसैंको मौका छोपेर खुलामञ्च ढलान गर्न लागेको भन्दै अभियन्ताहरूले अवरोध गरेका हुन्।
आइतबार बिहान साढे नौ बजे काठमाडौं महानगरपालिकाकी उपमेयर हरिप्रभा खड्गी, सांसद भीमसेनदास प्रधान र वडा नम्बर २८ का वडाध्यक्ष भाइराम खड्गीसहित खुलामञ्च पुगेर ढलान कार्य बन्द गराएका हुन्।
हिजोसम्म बस पार्किङको लागि बाहिर राखिएको थियो। अहिले भने सबै बस भित्र पार्किङ एरियामा छिराइएको छ।
ठाउँ ठाउँमा ढलान गरिएको देखिन्छ। अहिले अन्य काम भने बन्द गरिएको छ।
पुरानो बसपार्कमा 'भ्यू टावर' बनाउने भन्दै महानगरले खुलामञ्चमा अस्थायी बसपार्क सारेको थियो। ठेकेदारले टावर बनाउने काम सुरू नै नगरी अलपत्र छाडेको छ। यता खुलामञ्चमा भने अतिक्रमण रोकिएको छैन।
काठमाडौं महानगरले दसैंको मौका छोपेर खुलामञ्च कालोपत्रे गर्न रातारात डोजर चलाउन थालेको हो। शनिबार साँझ सात बजे खुलामञ्च पुग्दा अस्थायी बसपार्कलाई बाहिरबाट नदेखिने गरी जस्ताले बारिएको थियो।
कुनै समय 'एसियाकै ठूलो परेड मैदान' भनिने टुँडिखेलको एकचौथाइ हिस्सा पनि सर्वसाधारणले प्रयोग गर्न पाएका छैनन्। आधाभन्दा बढी सेनाकै अतिक्रमणमा परेको छ। बचेको भाग महानगरले मिचेको छ। खुलामञ्च त्यसैमध्ये एक हो।
पहिले यो सबैका लागि खुला थियो, राजनीतिक तथा सामाजिक गतिविधि हुन्थे। महानगरपालिकाले पुरानो बसपार्कको जग्गा ‘व्यापारिक टावर’ बनाउन ठेक्का दिएपछि यो मञ्च पार्किङ स्थल बनेको छ।
यसअघि पनि खुलामञ्चमा ठेकेदार कम्पनीले व्यावसायिक सटर निर्माण गरेर भाडामा दिई अतिक्रमण गरेको थियो। महानगरले त्यो बेला आफूलाई कुनै जानकारी नभएको भन्दै पन्छिएको थियो। चौतर्फी विरोधपछि महानगरले सटरहरू हटाएको थियो।
