भक्तपुरको मध्यपुरथिमि नगरपालिका–४ एसएसचोकमा बाटो काट्दै गरेकी एक वृद्धा महिलालाई बलेरो जिपले ठक्कर दिँदा घटनास्थलमै मृत्यु भएको छ।
भक्तपुरबाट काठमाडौतर्फ जाँदै गरेको बा१४च १६८६ नम्बरको बलेरो जिपले ठक्कर दिँदा पैदलयात्री ओखलढुङ्गा लिखु गाउँपालिका–६ घर भई हाल मध्यपुरथिमि–४ एसएसचोक बस्ने ७६ वर्षीया लक्ष्मीदेवी भट्टराईको मृत्यु भएको महानगरीय प्रहरी परिसर भक्तपुरका प्रहरी नायब उपरीक्षक रेवतीरमण पोखरेलले जानकारी दिए।
तीव्रगतिमा आएको बलेरोले महिलालाई ठक्कर दिएको थियो। ठक्कर पछि फरार काभ्रे बेथानचोक गाउँपालिका–३ घर भई हाल काभ्रे भैँसेपाटी बस्ने २४ वर्षीय चालक विनोद घिमिरेले प्रहरी वृत्तमा मध्यपुरथिमिमा आत्मसमर्पण गरेको प्रहरीले जनाएको छ।
(रासस)
