१३ औं सागमा समाचार संकलनका लागि त्रिपुरेश्वर पुगेका पत्रकार सुमन चापागाइँमाथि प्रहरीले कुटपिट गरेपछि महानगरीय प्रहरी कार्यालय रानीपोखरीका डिआइजी शैलेश थापा क्षेत्री घटनास्थल पुगेका छन्। घटनास्थल पुगेर उनले घटना र त्यहाँको सुरक्षा अवस्थाबारे जानकारी लिएका छन्।
उनले घटनास्थलमा पुगेर पत्रकार कुट्ने प्रहरीमाथि छानबिन गरिने प्रतिबद्धता जनाए। ‘भिडियो हेर्दा प्रहरीबाट गैर व्यावसायिक काम भएको मैले महसुस गरेको छु’ डिआइजी थापाले भने, ‘कसुर अनुसार उनीहरुमाथि कारबाही हुन्छ।’
साग खेलमा प्रहरीले कम संयमता अपनाएको उनको बुझाइ छ।
आज हुने नेपाल र भुटानबीचको खेलको टिकट नपाएपछि सर्वसाधारणले विरोध गरेपछि प्रहरीले धरपकड गरेको थियो। सोही क्रममा भिडियो खिचेको भन्दै डिएसपी रुगम कुँवर र सन्तोषसिंह राठौंरले पत्रकारमाथि पनि हातपात गरेका थिए। पत्रकारले प्रहरीलाई तथानाम गाली गरेपछि कुटपिट गरेको प्रहरीको दावी छ।
