नेपाल प्रहरीका पूर्वडिआइजी रमेश खरेलले ‘हाम्रो नेपाल, हामी नेपाली’ अभियान चलाउने भएका छन्।
उक्त अभियानको औपचारिक घोषणा बिहीबार दिउँसो क्रिस्टल पार्टी भेन्यु बिजुलीबजारमा गरिनेछ। उक्त अभियानमा पूर्वरक्षा सचिव देवेन्द्र सिटौला, अभियन्ता ज्ञानेन्द्र शाहीलगायत छन्।
‘देशमा भएका विकृति, बिसंगति, भ्रष्टाचार, कुशासनको विरोध गर्न र जनतालाई सचेत बनाउन अभियान सुरू गर्न लागेका हौं,’ खरेलले सेतोपाटीसँग भने,‘नेपालभित्रका अरू साथीहरू पनि हुनुहुन्छ। विदेशमा रहेका नेपालीहरूको पनि साथ छ।’
उनले अभियान कसरी चलाउने भन्नेबारे थप जानकारी भोलिको कार्यक्रममा सार्वजनिक गरिने बताए। ‘अहिले यो अभियानको रूपमा मात्र रहन्छ। पछि साथीहरूले पार्टी खोलौं भन्नुभयो भने पार्टी पनि बनाउन सकिन्छ,’ खरेलले भने।
खरेलले २०७४ साल चैतमा डिआइजीबाट राजीनामा दिएका थिए। तत्कालीन डिआइजी सर्वेन्द्र खनाललाई आइजिपी बनाएपछि खरेलले राजीनामा दिएका हुन्।
