प्रदेश ५ सरकारले भारतीय सीमा क्षेत्रमा अलपत्र परेका नेपालीलाई समूह बनाएर सम्वन्धित जिल्लामा पठाउने निर्णय गरेको छ।
सोमबार बसेको मन्त्रिपरिषद्को बैठकले जिल्लामा पठाएर सम्बन्धित स्थानीय तहमार्फत क्वारेन्टाइनमा राख्ने र खानपीनको व्यवस्था गर्ने निर्णय गरेको हो।
त्यस्तै विभिन्न क्षेत्रमा रहेका निर्माण मजदुरलाई घर पठाउने व्यवस्था गर्ने निर्णय भएको छ। प्रमुख जिल्ला अधिकारीहरुले यातायात पास दिनुपर्ने छ भने
सम्बन्धित निर्माण कम्पनीले गाडीको व्यवस्था गर्नुपर्नेछ।
बैठकले खेती स्याहार्ने बेला भएकाले कृषि प्रयोजनमा प्रयोग हुने थ्रेसर, कम्बाइन मेशिन लगायतको लागि पालिकाभित्र कार्यकारी अधिकृतले र जिल्लाभित्र र बाहिरका लागि प्रमुख जिल्ला अधिकारीले पासको व्यवस्था मिलाउनुपर्ने जिम्मेवारी तोकेको छ।
१२ वटै जिल्ला प्रशासन कार्यालयमा पठाइएको पिपिई एम्बुलेन्स चालकलाई उपलब्ध गराउने जिम्मेवारी पनि प्रमुख जिल्ला अधिकारीलाई तोकिएको छ। त्यसैगरी कोरोनाको संक्रमण नियन्त्रण तथा रोकथाम र उपचारको लागि प्रदेश ५ मा तीन वटा प्रयोगशाला स्थापना गर्ने निर्णय भएको छ ।
प्रयोगशाला भैरहवाको गहुँ बाली अनुसन्धान केन्द्र परिसरमा, दाङको राप्ती स्वास्थ्य विज्ञान प्रतिष्ठानमा र नेपालगञ्जको भेरी अस्पतालमा स्थापना हुँदै छन्। तोकिएका तिनै स्थानमा तत्काल प्रयोगशाला स्थापना गरी कोरोना भाइरसको परीक्षण शुरु गर्न पनि निर्देशन दिइएको छ।