इजरायलका प्रधानमन्त्री बेन्जामिन नेतान्याहु १४ दिन 'आइसोलेसन'मा बस्ने भएका छन्।
एक संसदीय सहयोगीलाई कोरोना भाइरस भएको पुष्टि भएपछि इजरायलका प्रधानमन्त्री बेन्जामिन नेतान्याहूको कोरोना भाइरस परीक्षण गरिएको थियो।
सोमबार गरिएको परीक्षणमा प्रधानमन्त्री नेतान्याहु सहित उनको परिवार र कर्मचारी सबैको परीक्षण नतिजा 'नेगेटिभ' आएको थियो।
उनीहरूमा संक्रमण नदेखिएपनि त्यहाँको स्वास्थ्य मन्त्रालयको निर्देशन अनुसार संक्रमण पुष्टि भएका व्यक्तिको सम्पर्कमा आउने जोकोही १४ दिन 'सेल्फ आइसोलेसन'मा बस्नुपर्छ।
सोही नियम अनुसार ७० वर्षीय प्रधानमन्त्री १४ दिन आइसोलेसनमा बस्ने भएका हुन्।
नेतान्याहुका प्रवक्ताले ट्वीटरमार्फत प्रधानमन्त्री, उनका परिवार र कर्मचारी सबैको कोरना भाइरस परीक्षणको नतिजा 'नेगेटिभ' आएको जानकारी दिएका हुन्।
ट्वीटरमा उनले नेतान्याहू स्वास्थ्य मन्त्रालयको निर्देशन अनुसार क्वारेन्टाइनमा बस्ने बताएका छन्।
इजरायलका संचारमाध्यमहरूले संक्रमित भनिएका ती संसदीय सहयोगी गत साता विपक्षी पार्टीका सासंदहरूसहित प्रधानमन्त्री नेतान्याहु बसेको संसद बैठकमा उपस्थित रहेको जनाएका छन्।
इजरायलमा हालसम्म ४ हजार ६ सय ९५ जनामा कोरोना भाइरसको संक्रमण भेटिएको छ भने १६ जनाको ज्यान गएको छ।
एक इजरायली अधिकारीले प्रधानमन्त्री नेतान्याहुले हाल स्वास्थ्य निर्देशनहरुको पालना गरिरहेको बताए।
ती अधिकारीले नेतान्याहुले आफ्ना छलफलहरू भिडिओ कन्फ्रेन्सबाट गरिरहेको जानकारी दिए।
