भारतबाट फर्किएका ६ नेपालीलाई जिल्ला प्रशासन कार्यालय सप्तरीले क्वारेन्टिनमा पठाएको छ।
भारतबाट फर्किएका तर स्थानीय अधिकारीको सम्पर्कमा नआएका ६ जनालाई प्रहरीले बुधबार क्वारेन्टिनमा पठाएको हो।
'भारतबाट फर्किएर लुकेर बसेका ६ जना भेटाएका हौं,' प्रमुख जिल्ला अधिकारी सुनिल खनालले सेतोपाटीसँग भने,'सम्झाइबुझाइ गरेर क्वारेन्टिनमा राखिएको हो।'
उनीहरू नयाँदिल्लीबाट नै फर्किएका हुन् कि होइनन् भन्ने नखुलेको उनले बताए।
'उनीहरू दिल्लीबाटै फर्किएका हुन् भन्नेचाहिँ मैले पनि सुनेको हो तर दाबीका साथ भन्न सक्दिनँ,' उनले भने।
उनीहरूलाई राजविराजस्थित क्वारेन्टिनमा राखिएको छ।
यसअघि भारतका विभिन्न स्थानबाट नेपाल आएका एक सय बढी नेपालीहरूलाई क्वारेन्टिनमा राखिएको सप्तरीका डिएसपी तिलक भारतीले जानकारी दिए।
पछिल्लो समय नयाँदिल्लीको निजामुद्दिनस्थित मस्जिदको धार्मिक सभा सहभागीहरूलाई कोरोना भाइरस देखिएको छ। उक्त सभामा नेपालबाट पनि १९ जना सहभागी भएको खुलेको छ तर अहिले उनीहरू कहाँ छन् भन्ने खुलेको छैन।