जनकपुरधामस्थित प्रादेशिक अस्पतालको आइसोलेसन वार्डमा कोरोनाको आशंकामा राखिएका पाँच जनाको रिपोर्ट नेगेटिभ आएको छ।
प्रादेशिक अस्पतालको आइसोलेसनमा रहेका तिनीहरूको स्वाब परीक्षण शुक्रबार अस्पतालमै जडान गरिएको पिसिआर मेसिनबाट गरिएको थियो।
हिजै परीक्षण गरिए पनि आज उनीहरूको परीक्षणको रिपोर्ट आएको हो।
पाँचै जनाको स्वाब परीक्षणपछि रिपोर्ट नेगेटिभ आएको प्रदेश-२ को स्वास्थ्य निर्देशनालयको वरिष्ठ जनस्वास्थ्य प्रशासक विजय झाले जानकारी दिएका छन्।
उनका अनुसार कोरोना आशंकामा राखिएका छैठौं व्यक्तिको स्वाब परीक्षण समेत गरिएको छ।
छैठौं व्यक्तिको स्वाब परीक्षणको रिपोर्ट समेत आजै आउने बताइएको छ।
रूघाखोकी र ज्वरो लागेपछि कोरोनाको शंका लागेपछि उनीहरूको स्वाब परीक्षण गरिएको थियो।
पिसिआर मेसिनको अभावका कारण कोरोना संक्रमणको जाँचका लागि टेकुस्थित राष्ट्रिय जनस्वास्थ्य प्रयोगशालामा पठाउनु पर्ने बाध्यता थियो। प्रादेशिक अस्पतालमै मेसिन जडान भएपछि कोरोना संक्रमित रहे/नरहेको पत्ता लगाउन सहज भएको चिकित्सकहरूले बताएका छन् ।
