लकडाउनका कारण सवारी साधन नचल्दा डायलासिस गर्नुपर्ने मिर्गौलाका विरामी समस्यामा परेपछि गौतमबुद्ध सामुदायिक मुटु अस्पताल बुटवलले निःशुल्क बस संचालन गर्ने भएको छ।
दुई वर्षदेखि नवलपरासीको बर्दघाट, तिलोत्तमाको मणिग्रामसम्म दैनिक निःशुल्क बस सेवा संचालन गर्दै आएको अस्पतालले बिहीबारदेखि कपिलवस्तुको वाणगंगा नगरपालिकाको बनगाईसम्म निःशुल्क बस संचालन गर्ने भएको हो।
नियमित रुपमा डायलासिस गर्न आउने कतिपय विरामीहरु लकडाउनका कारण महँगो भाडा तिरेर एम्बुलेन्स मार्फत अस्पताल आउनुपरेको थियो भने कतिपय बुटवलमै कोठा भाडामा लिएर बस्न बाध्य थिए।
‘लकडाउनको मारमा डायलासिसका विरामी’ भन्ने शिर्षकमा सेतोपाटीमा समाचार सार्वजनिक भएपछि अस्पतालले कपिलवस्तुसम्म निशुल्क बस संचालन गर्ने निर्णय गरेको हो।
अस्पतालका अध्यक्ष एजाज आलमले अधिकांश विरामी हप्तामा दुईदिन मिर्गौला डायलासिस गर्नुपर्ने अवस्थाका भएकोले बिहीबार र सोमबार हप्ताको दुईदिन कोईली बनगाईसम्म बस संचालन गर्न लागिएको जानकारी दिए।
बिहीबार र सोमबार विहान नौं बजे बनगाईबाट छुट्ने उक्त बस विरामीहरुको डायलासिस गरिसकेपछि साँझ ४ बजे पुनः विरामी छोड्न बनगाई जाने छ।
हाल फरकफरक दिनमा डायलासिस गराउँदै आएका सो क्षेत्रका विरामीहरुको समय बिहीबार र सोमबार मिलाएर भएपनि सेवा दिन लागिएको अध्यक्ष आलमले जानकारी दिए।
कपिलवस्तुसम्म बस सेवा संचालन हुने भएपछि बुटवलदेखि पश्चिम सैनामैना, सालझण्डी, रुद्रपुर समेतका सबै विरामीलाई राहत मिल्ने छ।
हाल बुटवलदेखि पश्चिम कपिलवस्तुसम्मका ६४ जना विरामी नियमित डायलासिसको लागि गौतमबुद्ध सामुदायिक मुटु अस्पतालमा आउने गरेका छन्।