राष्ट्रपति बिल क्लिंटन र ह्वाइट हाउसमा कार्यरत इन्टर्न मोनिका लेविन्स्कीको सम्बन्धका बारेमा खुलासा गर्ने लिन्डा ट्रिपको निधन भएको छ।
७० वर्षीय लिन्डाको अग्नाशयको क्यान्सरका कारण निधन भएको जानकारी उनको परिवारिक श्रोतले अमेरिकी संचारमाध्यमलाई दिएका छन्।
लिन्डाले सन् १९९८ मा राष्ट्रपति बिल र मोनिका लेविन्स्कीको सम्बन्ध खुलासा गरेपछि उनको एकातर्फ निकै प्रशंसा भएको थियो भने अर्को तर्फ पक्षपाती भनेर निन्दा समेत गरिएको थियो।
उनले सार्वजनिक गरेको उनी र मोनिकाबीचको टेपले राष्ट्रपति क्लिन्टनलाई महाअभियोग लगाउने प्रमुख आधार बनेको थियो।
लिन्डा ट्रिप
२४ वर्षको फरक भएपनि मोनिकासँग लिन्डाको मित्रता थियो। उनले राष्ट्रपति क्लिन्टन र मोनिकाबिच यौनसम्बन्ध रहेको सुनेपछि आफ्नो मोनिकासँगको कुराकानीलाई सन् १९९७ मा गोप्य रुपमा रेकर्ड गर्न सुरु गरेकी थिइन्।
पछि उनले सो टेप क्लिन्टन प्रशासनबारे अनुसन्धानको नेतृत्व गर्ने अभियोजनकर्ता केनेथ स्टारलाई हस्तान्तरण गरेकी थिइन्।
लिन्डाले देशभक्तीका कारण अनुसन्धानका लागि जानकारी सार्वजनिक गरेकोमा उनले त्यतिबेला जोड दिएकी थिइन्। तर आलोचकहरुले उनले मोनिकाको मित्रतालाई धोका दिएको र राष्ट्रपति पदलाई कमजोर तुल्याउन खोजेको आरोप लगाएका थिए।
