काठमाडौंबाट ७१ हजार ५ सय रुपैयाँ लुटपाट गरेर भाग्न खोज्ने चार जनालाई प्रहरीले पक्राउ गरेको छ।
महानगरीय प्रहरी वृत्त, स्वयम्भूले चार जनालाई शनिबार साँझ पक्राउ गरेको हो।
पक्राउ पर्नेमा काठमाडौं महागर-१४ बस्ने २४ वर्षीय सन्तोष बिष्ट, गोदावरी नगरपालिका-२ बस्ने २२ वर्षीय गगन तामाङ, दक्षिणकाली बस्ने ३७ वर्षीय कृष्ण बहादुर खड्का र ३२ वर्षीय सरोज खड्का छन्।
शनिबार बाँके कोहलपुर नगरपालिका-११ घर भएका ४२ वर्षीय खडक बहादुर वाइबा नागार्जुन नगरपालिका-४ बाफल चोकबाट बस चढेर स्वयम्भू जाँदै थिए। सोल्टी दोबाटो पुग्दा उनीहरुले वाइबाको ७१ हजार ५ सय रुपैयाँ लुटेर गाडीबाट झरेर भागेका थिए।
वाइबाले प्रहरीलाई तत्कालै खबर गरेपछि महानगरीय प्रहरी वृत्त स्वयम्भूबाट खटिएको प्रहरीले उनीहरूलाई पक्राउ गरेको हो।
उनीहरू बा.२ ज ४१७ नम्बरको ट्याक्सी चढेर भाग्न खोजेको अवस्थामा रकमसहित फेला पारी पक्राउ गरेको हो। प्रहरीका अनुसार उनीहरूले समूह बनाइ लुटपाट गर्ने गर्थे। यस सम्बन्धमा प्रहरीले थप अनुसन्धान गरिरहेको छ।
