चीनले म्यानमारको सीमासँग जोडिएको सहरमा लकडाउन गरेको छ। म्यानमारबाट आएका दुई जनामा कोरोनाभाइरसको संक्रमण पुष्टि भएपछि युनान प्रान्तको रूइली सहरका अधिकारीहरूले कोरोना भाइरसविरूद्ध 'युद्धकालीन' अवस्थामा पुगेको बताएका छन्।
रूइलीवासीलाई घरमै बस्न आदेश दिइएको छ भने सहरमा आउन र कसैलाई बाहिर पनि जान नदिन चेक पोइन्ट स्थापना गरिएका छन्।
उक्त सहरका दुई लाख बढी मानिसको कोरोना परीक्षण गरिने भएको छ।
बिहीबारमात्रै त्यस शहरमा तीन सय ६० स्थानमा परीक्षणस्थल स्थापना गरिएको छ। कोरोना परीक्षण गर्न १२ सय स्वास्थ्यकर्मी परिचालन गरिएका छन्।
स्थानीय अधिकारीहरूले पूर्ण निरीक्षण, कडा क्वारेन्टिन, नो इन्ट्री र नो एग्जिटको नीति अपनाएका छन्।
साथै अवैध आप्रवासीहरूको पनि खोजी गर्ने र आफ्नो घर, काम गर्ने ठाँउ बताउन नसक्नेहरूलाई फिर्ता पठाउने अधिकारीहरूले बताएका छन्।
पछिल्लो समय दक्षिण पूर्वी एसियाली मुलुक म्यानमारमा कोरोना संक्रमण बढिरहेको छ।
