भारतीय प्रधानमन्त्री नरेन्द्र मोदी कहिल्यै पनि क्लिन सेभ गरेका देखिन्नन्। उनले सधैँ छोटा दाह्री जुंगा राखेकै हुन्छन्।
पछिल्लो समय भने मोदीका दाह्रीजुंगा बढेका छन्। सेतै फुलेका दाह्रीजुंगाले उनी साधुजस्ता देखिन्छन्।
कोरोनाभाइरसको संक्रमण रोक्न गत मार्चमा भारतले देशव्यापी लकडाउन गरेको थियो। केही महिनासम्म लकडाउन गर्दा पनि भारतमा कोरोनाको संक्रमण नरोकिएपछि लकडाउन खोलियो। लकडाउन खोलेसँगै भारतमा कोरोनाको संक्रमण तीव्र रूपमा बढिरहेको छ। अहिले भारतमा दैनिक ९० हजार बढी कोरोना संक्रमित थपिन्छन् भने अमेरिकापछि सबैभन्दा बढी संक्रमण भारतमै फैलिएको छ।
यस्तो बेलामा सञ्चारमाध्यममा झ्याप्प दाह्रीजुंगा पालेका मोदीको तस्बिर देखेपछि सामाजिक सञ्जाल प्रयोगकर्ताले उनीमाथि व्यंग्य गर्न थालेका छन्।
एक जनाले ट्वीटर प्रयोगकर्ताले लेखेका छन्- प्रधानमन्त्री मोदीका दाह्रीजुंगाले भारतमा कोरोनाको संक्रमण वृद्धिलाई देखाउँछ। जति -जति केसहरू बढ्छन् त्यति नै उनका दाह्री पनि!
अर्का प्रयोगकर्ताले ‘मोदीका दाह्री र भारतमा कोरोना संक्रमित दिनदिनै बढिरहेका छन्। मोदीका लागि योभन्दा ठूलो उपलब्धि के हुन सक्छ!' भनेर लेखेका छन्।
‘यो समयमा बढिरहेको भनेको गोदी मिडियाको चाप्लुसी, बेरोजगारी र मोदीका दाह्रीमात्रै हुन्,’ अर्की एक प्रयोगकर्ताले भनेकी छन्।
भारतमा लकडाउन कडा पार्न प्रहरी गरेको व्यवहारका कारण दुर्व्यवहार, हातपात र मृत्यु बढेको समाचारलाई कोट ट्वीट गर्दै एक ट्वीटर प्रयोगकर्ताले सोधेका छन्- सरकारले मोदीको दाह्री बढेको हिसाब राखेको छ कि छैन?
कोरोनाभाइरसका कारण भारतमा पछिल्लो तीनमा महिनामा अर्थतन्त्र झन्डै २४ प्रतिशतले खुम्चिएको छ भने बेरोजगारी ह्वात्तै बढेको छ।
केहीले मोदीको ६ वर्षे कार्याकालमा अर्थतन्त्र, सामाजिक न्याय, विकास केही नबढेको तर उनको दाह्रीजुंगा बढेको लेखेका छन्।
केही प्रयोगकर्ताले भने मोदीले अब साधु हुने लाइन देखाएको आँकलन गरेका छन्। केहीले उनी रिटायर्ड भएर बलिउडमा अभिनय गर्न जाने भन्दै व्यंग्य गरेका छन्।
यसअघि क्यानडाका प्रधानमन्त्री जस्टिन ट्रुडोले पनि लकडाउनका बेला दाह्रीजुंगा काटेका थिएनन्। उनले सामाजिक दूरी कायम गर्नु परेकाले दाह्रीजुंगा काट्न नपाएको बताएका थिए।