लैनचौरबाट कटुवा पेस्तोलसहित एक पक्राउ परेका छन्।
सशस्त्र प्रहरी(एपिएफ)ले काठमाडौं महानगरपालिका-२६ लैनचौर क्षेत्रबाट बुधबार एक जनालाई कटुवा पेस्तोलसहित पक्राउ गरेको हो।
प्रहरी निरीक्षक सुमन शर्माका अनुसार पक्राउ पर्ने सिन्धुपाल्चोक भोटेचौर गाउँपालिका-३ घर भई सामाखुसी टाउन प्लानिङ बस्ने २८ वर्षीय कृष्ण चौलागाईं छन्।
एपिएफ इन्टेलिजेन्स ब्युरोले विशेष सूचना पाएको थियो। सोही सूचनाको आधारमा सशस्त्र प्रहरी बल, नेपाल नम्बर २४ गुल्मबाट खटिएको टोलीले लैनचौरबाट चौलागाईंलाई पक्राउ गरेको हो।
पेस्तोलमा प्रयोग हुने एक गोली र मोबाइल फोन पनि बरामद भएको छ।
थप अनुसन्धान गर्न एपिएफले उनलाई नेपाल प्रहरीसमक्ष बुझाएको छ।
