कञ्चनपुरमा घरायसी विवाद हुँदा बुहारी र नातिले वृद्धको हत्या गरेका छन्।
भीमदत्त नगरपालिका-२ पशुपती टोलका ७६ वर्षीय प्रेम थापालाई उनकै बुहारी ३५ वर्षीया सिता थापा र नाति नाता पर्ने १८ वर्षीय अर्जुनले कुटपिट गरेर हत्या गरेका हुन्।
उनीहरूले माघ २८ गते घरायसी विवादका क्रममा वृद्धमाथि चिर्पट प्रहार गरी गम्भीर घाइते पारेका थिए।
उनको उपचारका क्रममा सोमबार महाकाली अस्पतालमा मृत्यु भएको जिल्ला प्रहरी कार्यालय कञ्चनपुरका प्रवक्ता प्रहरी नायब उपरीक्षक अमर थापा क्षेत्रीले जानकारी दिए।
कुटपिट गरी हत्या गर्ने बुहारी र नातिलाई प्रहरीले आवश्यक कारबाहीका लागि प्रकाउ गरेको छ।
घटना बारे थप अनुसन्धान भइरहेको प्रहरीले जनाएको छ।
