गत चैत २३ गते पोखराको महतगौडामा पर्वतका मनोज विकमाथि गोली प्रहार गर्ने एक पुरुषलाई प्रहरीले पक्राउ गरेको छ।
पर्वत मोदी ८ चित्रे घर भई पोखराको कार्की तहरा बस्दै आएका विक माथि गोली प्रहार गरेको आरोपमा प्रहरीले बाराको बरियारपुर नगरपालिका ४, पिपरावृत्ताका ४५ वर्षीय राजकिशोर पाण्डेलाई पक्राउ गरेको हो ।
जिल्लाका प्रहरी प्रमुख प्रहरी उपरीक्षक (एसपी) जीवन श्रेष्ठका अनुसार उनलाई आइतबार पोखरा महानगरपालिका-१ सिमपानीबाट पक्राउ गरेको हो। उनी पोखरामा मेटल सम्बन्धी काम गर्दै आएका थिए ।
वायरिङको काम गर्ने उनले आफूलाई अपरिचित व्यक्तिले गोली हानेर भागेको भन्दै प्रहरी कार्यालय पुगेका थिए। प्रहरीका अनुसार उनी घाइते अवस्थामै मोटरसाइकलमा चढेर वडा प्रहरी कार्यालय बैदाम पुगेका थिए।
प्रहरीले तत्कालै उनको उपचारको लागि गण्डकी मेडिकल कलेज पुर्याएको थियो। उनको पेटको दाहिने कोखामा अगाडिपट्टीबाट प्वाल पारी पछाडि ढाडको भागमा समेत चोट देखिएको एसपी श्रेष्ठले बताए।
एसपी श्रेष्ठसहित खटिएको टोलीले घाईतेसँग हुलिया बुझेर अनुसन्धान अघि बढाएको थियो।
घटनामा पर्सा विरगंज आदर्शनगरमा अस्थायी बसोबास भई पोखरामा मेटललगायतको काम गर्ने पाण्डेको संलग्नता रहेको पाएको थियो।
अनुसन्धानपछि प्रहरीले उनलाई आइतबार पक्राउ गरेको हो। पाण्डेको साथबाट ७.६५ एमएमको ३ राउण्ड गोली, पर्स र एक मोबाइल बरामद गरेको एसपी श्रेष्ठले बताए ।
उनले गोली हानेर भाग्नुको कारण खुलि नसकेको एसपी श्रेष्ठले बताए।
'अहिले भर्खरै हामीले समाएर ल्यायौं। कारण खुलिसकेको छैन। वृस्तृत विवरण पछि आउला,'उनले सेतोपाटीसँग भने।
