पछिल्लो समय प्रमुख जिल्ला अधिकारी, विभिन्न जनप्रतिनिधि तथा नगरपालिकाले प्रयोग गर्दै आएका सवारीसाधनलाई एम्बुलेन्सको विकल्पका रुपमा प्रयोग गर्न थालिएको छ।
यसै क्रममा डडेल्धुराको अमरगढी नगरपालिकाकाले प्रयोग गर्दै आइरहेको गाडी एम्बुलेन्स बनाउने निर्णय भएको छ।
नगरपालिकाका सूचना अधिकारी लाल बहादुर साउदले आवश्यक परेको बेला जनप्रतिनिधि र कर्मचारीले प्रयोग गर्दै आएको बलेरो जिप पनि कोरोना संक्रमितलाई बोक्न एम्बुलेन्सको रुपमा प्रयोग गर्ने निर्णय भएको बताए।
यस्तै नगरपालिकाकै टिपरलाई पनि शव वहानका रुपमा प्रयोग गर्ने कार्यापालिकामा निर्णय भएको सूचना अधिकारी साउदले जानकारी दिए।
त्यस्तै दार्चुलाका प्रमुख जिल्ला अधिकारी शिद्धराज जोशीले आफूले चढ्ने गाडीलाई बिरामी बोक्ने एम्बुलेन्सको रुपमा प्रयोग गर्ने घोषणा गरेका छन्।
एम्बुलेन्स अभाव हुन सक्ने सम्भावनालाई मध्यनजर गर्दै उनले चढ्दै आएको गाडीलाई एम्बुलेन्स बनाउने घोषणा गरेका हुन्।
प्रमुख जिल्ला अधिकारी जोशीले हाल कोरोना भाइरस संक्रमित बाहेकका बिरामीलाई बोक्ने गरी एम्बुलेन्सको रुपमा प्रयोग गर्न दिएको बताए।
शुक्रबार जिल्ला प्रशासन कार्यालय दार्चुलामा बसेको कोभिड–१९ संकट व्यवस्थापन केन्द्रको बैठकमा उनले गाडीलाई एम्बुलेन्सको रुपमा प्रयोग गर्ने प्रस्ताव राखेका थिए।
डोटीको बोगटान फुड्सिल गाउँपालिकाका अध्यक्षले आफू चढ्ने गाडीलाई कोरोना संक्रमित बोक्न एम्बुलेन्सको रुपमा प्रयोग गर्न दिएका छन्।
संक्रमितलाई बोक्न समस्या भइरहेको बेला गाउँपालिकाका अध्यक्ष कमलबहादुर गड्सिलाले एम्बुलेन्सको रुपमा प्रयोग गर्न दिएको गाउँपालिकाका सूचना अधिकारी भरतबहादुर चन्दले बताए।
‘अध्यक्षले ज्यूले आफू चढ्ने गाडीलाई एम्वुलेन्सको रुपमा प्रयोग गर्न दिन्छु भन्नुभयो, उहाँको प्रस्तावलाई विपद व्यवस्थापन समितिले बिहीबार निर्णय गर्यो’ उनले भने ‘त्यसपछि अहिले गाउँपालिकाका संक्रमितलाई बोक्ने काम भइरहेको छ, आजै एक संक्रमित बोकेर गाडी धनगढी गएको छ।’
उनले अहिले संक्रमितलाई अस्पतालसम्म पुर्याउन र ल्याउन सहज भएको बताए।