लुम्बिनी प्रदेशको बाँके र दाङमा गरी नौ संक्रमितको मृत्यु भएको छ। यीमध्ये सात बाँके र दुई दाङका छन्।
बाँकेमा अस्पताल भर्ना भएका थप सात कोरोना संक्रमितको गएराति मृत्यु भएको छ।
बर्दियाका तीन, बाँकेका दुई, रोल्पाका र कैलालीका एक-एक गरी सातको उपचारका क्रममा अस्पतालमै मृत्यु भएको जिल्ला कोभिड संकट व्यवस्थापन केन्द्र बाँकेका स्रोतव्यक्ति तेज वलीले जानकारी दिए।
उनका अनुसार नेपालगञ्जस्थित भेरी अस्पतालमा उपचाररत नेपालगञ्ज उपमहानगरपालिका-१९ निवासी ६० वर्षीय पुरूष, कोहलपुर नगरपालिका-१५ निवासी ६७ वर्षीय पुरूष, मधुवन नगरपालिका-९ बर्दिया निवासी ७१ वर्षीय पुरूष, बढैयाताल गाउँपालिका-१ बर्दिया निवासी ५० वर्षीय पुरूष, रुण्टीगढी गाउँपालिका रोल्पा निवासी ३५ वर्षीय पुरूष र बढैयाताल-२ निवासी ८७ वर्षीय पुरूषको गए राति मृत्यु भएको हो।
यसैगरी शिक्षण अस्पताल कोहलपुरमा उपचाररत गौरीगङ्गा गाउँपालिका-४ कैलाली निवासी ५२ वर्षीय पुरूषको पनि गएराति उपचारका क्रममा मृत्यु भएको हो।
योसँगै बाँकेमा कोरोनाबाट २३४ जनाको मृत्यु भएको छ।
बाहिरी जिल्लाबाट यहाँ उपचार गराउन आउँदा १८३ जनाको मृत्यु भएको जिल्ला कोभिड संकट व्यवस्थापन केन्द्रका स्रोत व्यक्ति वलीले बताए।
बेलझुण्डीमा दुई संक्रमितको मृत्यु
दाङको कोरोना विशेष अस्पताल बेलझुण्डीमा उपचाररत दुई सङ्क्रमितको मृत्यु भएको छ।
अस्पतालका व्यवस्थापक द्रोण वलीका अनुसार शनिबार एचडियुमा उपचाररत दङ्गीशरण गाउँपालिका-४ निवासी ७० वर्षीय पुरुष र आइसियूमा उपचाररत घोराही उपमहानगरपालिका–१४ निवासी ७४ वर्षीय महिलाको मृत्यु भएको हो।
दङ्गीशरणका पुरूष गत वैशाख २४ गते अस्पताल भर्ना भएका थिए भने घोराहीकी महिला वैशाख २१ गते भर्ना भएकी थिइन्। उनीहरू दुवै जनामा निमोनिया र श्वासप्रश्वासमा समस्या थियो। योसँगै बेलझुण्डी अस्पतालमा मृत्यु हुनेको सङ्ख्या ४४ पुगेको छ। सोमा १४ महिला र पुरूष ३० छन् । रासस
