दाङ घोराहीस्थित राप्ती स्वास्थ्य विज्ञान प्रतिष्ठानले मंगलबारदेखि आइसियू बेड सञ्चालनमा ल्याएको छ।
मंगलबारदेखि दश बेडको आइसियू सेवा सञ्चालन गरेको प्रतिष्ठानकी उपकुलपति प्राध्यापक डाक्टर संगीता भण्डारीले जानकारी दिइन्।
उनले तत्काल दश बेड थपेर २० शय्याको पुर्याउने गरी काम भइरहेको पनि बताइन्।
प्रतिष्ठानले असारको तेस्रो हप्ताभित्रै दुइटा अक्सिजन प्लान्ट पनि जडान गरिसक्ने भण्डारीले बताइन्।
प्रतिष्ठानले कालो ढुसी अर्थात् म्युकोर्माइकोसिसको परीक्षण र उपचार गर्ने व्यवस्था सुरू गरिएको उनले बताइन्।
उक्त रोग उपचारका लागि विशेषज्ञ डाक्टरको व्यवस्था गरिएको प्रतिष्ठान प्रशासनले जनाएको छ।
थप अन्य दुई जना नाक, कान, घाँटी रोग विशेषज्ञको टोलीले रोगको परीक्षण र उपचार गर्ने डाक्टर भण्डारीले बताइन्।
उनले कोरोना भाइरसको तेस्रो लहरबाट बालबालिका धेरै प्रभावित हुनसक्ने सम्भावनालाई मध्यनजर गर्दै बालबालिकाका लागि २० बेडको आइसियू, १० बेडको प्रिआइसियू र ६ बेडको एनआइसियू छिट्टै सञ्चालन गर्ने गरी तयारी भइरहेको पनि उनले जानकारी दिइन्।
त्यस्तै, कोरोना भाइरसको दोस्रो लहरको जोखिम कायमै रहेको भन्दै प्रतिष्ठानले सम्भावित जोखिमका बिरामीका लागि छुट्टै वार्ड पनि सुरू गरेको छ।
बिरामी सङ्क्रमणमुक्त भएपछि पनि जोखिम रहने हुँदा छुट्टै वार्ड नै बनाएर उपचार गर्दै आएको अस्पताल प्रशासलने जनाएको छ।
कोभिड निको भएर घर फर्किएका बिरामीलाई १४ दिनसम्म जटिलता देखिनसक्ने हुँदा उनीहरूका लागि फोन तथा भर्चुअल माध्यमबाट परामर्श दिने र आवश्यक परे फेरि अस्पतालमा बोलाएर उपचार गर्न व्यवस्था मिलाइएको प्रतिष्ठानले जनाएको छ।