गोरखाको धार्चे गाउँपालिकाको कामकाज छिमेकी जिल्लाको एक होटल भाडामा लिएर सुरू गरिएको छ।
बाढीपहिरोले स्थानीय लघु जलविद्युत आयोजना विग्रेको र सडक अवरूद्ध हुँदा गाउँपालिकाको केन्द्र माछीखोलाबाट दैनिक कामकाज सम्भव नभएपछि धादिङको त्रिपुरासुन्दरी गाउँपालिका वडा नम्बर २ स्थित आरूघाट-विशालनगरबाट सेवा सुरू गरिएको छ।
गाउँपालिकाकी उपप्रमुख फूलकुमारी गुरूङले योजना, प्रशासन, लेखा र आइटी सम्बन्धी शाखाहरू होटलका कोठा भाडामा लिएर सञ्चालन गरिएको बताइन्।
‘यो रहर होइन हाम्रो बाध्यता हो,’ उनले सेतोपाटीसँग भनिन्, ‘लघुजलविद्युत् अवरूद्ध छ। इन्टरनेट पनि चलेको छैन। पहिरोले सडक पनि अवरूद्ध भयो। कामकाज गर्न सक्ने अवस्था नभएपछि होटलका कोठा एक महिनाका लागि भाडामा लिएर कामकाज सुरू गरिएको छ।’
गाउँपालिकाको केन्द्र माछीखोलाबाट गाउँपालिकाका अन्य सेवा भने सुचारू नै छन्। गाउँपालिकाको कार्यालयमा अहिले प्रमुख सन्तोष गुरूङ छन् भने उपप्रमुख गुरूङ सदरमुकाममा बैठकमा भाग लिएर आरूघाट-विशालनगरस्थित नयाँ कार्यालय फर्कंदैछिन्।
धार्चे गाउँपालिका आरूघाटभन्दा माथिल्लो क्षेत्रमा रहेको गाउँपालिका हो।
‘आरूघाटमा कार्यालय खोल्न लागेका थियौं। होटल नै पाइएन,’ उनले भनिन्, ‘धादिङतर्फ होटल खालि रहेछ, एक महिनाका लागि तीन वटा कोठा भाडामा लिएका छौं। कार्यालयको कामकाज र कर्मचारी होटलमै बस्नुहुन्छ।’
आर्थिक वर्ष सकिन लागेकोले धेरै योजनाका भुक्तानी दिनुपर्नेछ।
‘गाउँपालिकाको खाता सिभिल बैंकमा छ, सिभिलको शाखा गोरखा सदरमुकाममा छैन त्यसैले आरूघाटमा एक महिनाका लागि कार्यालय खोलेका हौं,’ उनले भनिन्, ‘माछीखोलामा मोबाइल नेटवर्क पनि कहिलेकाहीँ देखाउँदैन। इन्टरनेट पनि टुटेकोले केन्द्रसँग सम्पर्क भएन त्यसैले आरूघाट-विशालनगरमा वैकल्पिक कार्यालय नै खोल्नुपर्ने बाध्यता आइपर्यो।’
माछीखोलामा गाउँपालिका कार्यालय छेवैमा सिभिल बैंकको शाखा छ।
गाउँपालिकाका कर्मचारीहरू माछीखोलास्थित गाउँपालिका केन्द्र र नयाँ खुलेको कार्यालयमा बाँडिएर काम गरिरहेका छन्। नयाँ खोलेको कार्यालयदेखि माछीखोलास्थित केन्द्र पुग्न करिब पाँच घण्टा हिड्नुपर्छ। हिउँदमा माछीखोलासम्म सवारी साधन चले पनि बर्खामा पहिरोले सडक अवरूद्ध छ।