कोरोना संक्रमितको संख्या बढेको भन्दै जिल्ला प्रशासन कार्यालय गोरखाले फेरि निषेधाज्ञालाई कडा बनाउने भएको छ।
भदौ १ गते राति १२ बजेदेखि भदौ ११ गते राति १२ बजेसम्म कडाइका साथ निषेधाज्ञा लागू गर्ने निर्णय प्रशासनको छ।
यसअवधिमा अत्यावश्यकबाहेक सार्वजनिक तथा निजी सवारी साधनहरू सञ्चालन गर्न नपाइने निर्णय प्रशासनले गरेको छ। बैंक तथा वित्तीय संस्थाका सेवा बन्द गरिने पनि निर्णय भएको छ।
निर्माण सामग्रीलगायत ढुवानी गर्ने सवारी साधनमा चालक र सहचालक गरी दुई जना मात्रै सवार गर्न दिइने निर्णय भएको छ।
सरकारी गाडी चलाउन भने प्रशासनले छुट दिएको छ।
‘अत्यावश्यक सरकारी कामकाजका लागि प्रयोग हुने सरकारी सवारी साधनबाहेकका सार्वजनिक सवारी साधन तथा निजी सवारी साधनहरू सञ्चालन गर्न नपाइने’ प्रशासन कार्यालयले आज निकालेको विज्ञप्तिको ३ नम्बर बुँदामा उल्लेख छ।