जनकपुरमा निजी विद्यालयका शिक्षक-शिक्षिकाको कुटाइबाट एक विद्यार्थी घाइते भएका छन्।
जनकपुर उपमहानगरपालिका वडा नम्बर ४ स्थित स्वस्तिक इङ्लिस बोर्डिङ स्कुमा कक्षा ४ मा अध्ययनरत् सिद्धार्थ ठाकुर घाइते भएका हुन्।
विद्यालयकी शिक्षिका शोभा साह र शिक्षक रब्बानी हुसैनले कुटपिट गर्दा उनको दाहिने हात भाँच्चिएको छ।
सिद्धार्थका बुवा जितेन्द्र ठाकुरका अनुसार गएको बुधबार होमवर्क नबनाएको भन्दै शिक्षिका साहले उनलाई पाइपले निर्घात कुटेकी थिइन्।
बिहीबार समेत शिक्षक रब्बानीले डस्टर लिएर हातको सोही भागमा हिर्काउँदा दुखाई सहन नसकेर सिद्धार्थ चिच्याउँदै घर भागेका थिए।
लगत्तै सिद्धार्थका बुवा जितेन्द्रले विद्यालयका प्राधानाध्यपक श्यामसुन्दर साहलाई कुटपिट गरेको गुनासो सुनाउन पुगेका थिए।
‘प्रिन्सिपल सरले तातोपानीले मालिस गर्नुस्। समान्य चोट हो, मल्हम लगाउँदा ठिक भइहाल्छ भन्नुभयो,’ अभिभावक ठाकुरले भने, ‘गाउँबाट दुई तीन दिन दबाई गर्दा ठिक नभएपछि एक्सरे गरेर चेकजाँच गराउँदा डाक्टरले आधा हड्डी क्रेक भएको भन्नुभयो।’
उनका अनुसार स्कुलका शिक्षक तथा शिक्षिकाले त्यसअघि समेत सिद्धार्थलाई पटक-पटक कुटपिट गरेका थिए। तर बदमासी गर्दा पिटेको होला भनी वास्ता नगरेको उनले बताए।
‘बच्चाले जति बदमासी गरे पनि यसरी कुट्ने त होइन नि? एउटा हात बच्चामै टुटेर ड्यामेज भइसकेको थियो अर्को हात स्कुलका शिक्षक-शिक्षिकाले भाँचिदिए,’ उनले गुनसो पोखे, ‘मेरो बच्चाको जीवनै बर्बाद गरेर अब दबाईमा जति पैसा लाग्छ दिन्छु भन्दैछन्।’
शिक्षिका शोभाले बुधबार पाइपले सिद्धार्थलाई पिटेको प्रधानाध्यापक साहले समेत स्वीकार गरे।
‘विद्यार्थीले कक्षामा हल्ला गर्थे। होमवर्क पनि गरेका थिएनन्। त्यसैले शोभा म्याडमले उसलाई एक पटक पाइपले हिर्काएको हो। भोलिपल्ट रब्बानी सरले डस्टरले हिर्काउनुभएको हो,’ उनले भने, ‘दबाइमा के कति खर्च लाग्छ त्यसमा मिलाइदिन्छु भनेको छु।’
विद्यार्थीलाई पाइपले कुट्ने शिक्षिका प्रधानाध्पाक साहका पत्नी हुन्।