पुस २३ गते सर्लाहीको बरहथवामा मृत अवस्थामा फेला परेकी महिलाको हत्या आरोपमा प्रहरीले तीन जनालाई पक्राउ गरेको छ।
हरिवन नगरपालिका-१०, ताइवानका २७ वर्षीय सन्तोष साह, २७ वर्षीय मुकेश ब्लोन र २२ वर्षीय रोहित हजरालाई प्रहरीले पक्राउ गरेको हो। उनीहरूलाई इलाका प्रहरी कार्यलय बरहथवाले शनिबार पत्रकार सम्मेलन गरी सार्वजनिक गरेको छ।
गत पुस १७ गतेबाट बेपत्ता भएकी बरहथवा नगरपालिका-१० की ३२ वर्षीया सावित्रीकुमारी महराको घरबाट केही टाढा उखुबारीमा शव फेला परेको थियो। शरीरको विभिन्न भाग जलेको अवस्थामा उनको शव फेला परेको थियो।
अनुसन्धानका क्रममा घटनामा उनीहरूको संलग्नता रहेको देखिएको इलाका प्रहरी कार्यलय बरहथवाका प्रमुख प्रहरी नायब उपरीक्षक उमाशंकर यादवले बताए।
अनुसन्धान अनुसार मृतक महिला र अभियुक्त सन्तोष साहबीच केही समययता प्रेम सम्बन्ध रहेको यादवले बताए।
सोही सम्बन्धका कारण महिलाले सन्तोषलाई बिहे गर्न दबाब दिँदै आएकी थिइन्। दबाब दिन थालेपछि सन्तोषले गाउँकै दुई साथीलाई पैसा दिने लोभ देखाएर हत्यामा संलग्न गराएको यादवले बताए।
मृतक महिलाका श्रीमान् विगत १० बर्षदेखि रोजगारीको सिलसिलामा कतार छन्। उनी दुई वर्ष पहिले नेपाल आएर फेरि कतार गएका थिए।
मृतक महिलाका तीन छोराछोरी छन्। श्रीमान् सुरतले कमाएको पैसाले उनीहरूले घरबाट केही पर जग्गा किन्ने बनाएका थिए। उनले आफूले कमाएको पैसा श्रीमतीलाई पठाउँदै आएका थिए।
जग्गा किन्ने क्रममा सन्तोषसँग मृतक महिलाका बुवाको चिनजान भएको थियो। त्यो चिनजान श्रीमान सुरत हुँदै मृतक महिलामा आएर जोडिएको यादवले बताए।
जग्गा किन्न भनेर मृतक महिलाले सन्तोषलाई दुई लाख बैना दिएकी थिइन्।
यसपछि उनीहरूको नियमित भेटघाट र फोन सम्पर्क भएको प्रहरीको यादवले बताए। सन्तोष महिलाको घरमा पुग्ने गरेका थिए।
‘भेटघाटको समय बित्दै जाँदा महिलाले सन्तोषलाई विवाह गर्न दबाब दिन थालेको अनुसन्धानमा खुलेको छ,’ यादवले भने, ‘श्रीमान् घर फर्कने दिन नजिँकिदै जाँदा उनलाई तनाव बढ्दै गएको थियो।’
अनुसन्धानमा गत पुस १७ गते महिलाले फोनमा सन्तोषलाई आफूलाई भगाउन दबाब दिएको खुलेको छ। सन्तोषले पनि हुन्छ भनेका थिए।
तर, त्यसपछि सन्तोष महिलालाई कसरी पन्छाउने ध्याउन्नमा लागेका थिए।
साथीभाइ बोलाएर उनले एक होटलमा बसेर सँगै मदिरा सेवन गरे। सन्तोषले साथीहरूसँग आफ्नो समस्या राखेका थिए। साथीहरूले महिलाको हत्या गर्ने उपाय सुझाएको अनुसन्धानमा खुलेको छ।
‘सन्तोषले केही पैसा दिने लोभ देखाएर दुई साथीसँग सहयोग मागेका थिए। साथीहरू मुकेश र रोहितले साथ दिने भएपछि सन्तोषले आफू लिन आउँदै गरेको बताउँदै राति ८ बजेतिर तयार भएर बस्न महिलालाई आग्रह गरेको देखिन्छ,’ डिएसपी यादवले भने।
यसपछि तिनै जना महिलाको घर थए। योजना अनुसार सन्तोषले दुई जनालाई कटानीस्थित उखुघारीमा लुकेर बस्न अह्राए। आफू मोटरसाइकलमा महिलालाई लिन गए।
सन्तोषले महिलालाई लिएर आए। पिसाब फेर्ने बहानामा मोटरसाइकल रोकेर उखुबारी गए। त्यसलगत्तै तिनै जना आएर महिलाको मुख र घाँटीमा थिचेर हत्या गरेका थिए।
‘त्यसपछि उनीहरूले शव उखुबारीमा फालिदिएका थिए। प्रमाण मेटाउने उद्देश्यले उनीहरूले महिलाको कपडा खोलेर मोटरसाइकलको ट्यांकीबाट पेट्रोल झिकी आगो लगाउन खोजेका थिए,’ यादवले भने, ‘तर, जलाउन खोज्दा उनीहरूसँग लाइटर थिएन।’
उनीहरू बरहथवा बजारमा रहेको एक पसलमा पुगे। दुई वटा चुरोट र लाइटर किनेर फेरि महिलाको शव भएको स्थानमा फर्किए।
आगो लगाएर उनीहरू फर्किए। महिलाको हत्या गर्दा उनको ब्याग सँगै लिएर गएका थिए। सो ब्याग केही पर सोल्टी गेटनजिकै फेला परेको थियो।
‘पैसा फेला नपरेपछि ब्याग त्यहीँ फालेर उनीहरू घर फर्किएका थिए,’ यादवले भने, ‘स्थानीयले शव देखेपछि गत पुस २३ गते प्रहरीले घटनास्थलको मुचुल्का तयार गरेर परीक्षणको लागि जिल्ला अस्पताल पुर्याएको थियो।’
उनीहरू सबैलाई कर्तव्य ज्यानमुद्दामा अदालतबाट हिरासतमा राख्ने अनुमति लिएर अनुसन्धान थालिएको यादवले बताए।
