पक्राउ परेका गाउँपालिका अध्यक्ष उम्मेदवार सिद्धार्थ यादवलाई प्रहरीले तत्कालका लागि छाडेको छ।
सिरहा, औरही गाउँपालिकामा माओवादी केन्द्रबाट अध्यक्षका उम्मेदवार यादवलाई भोलि हाजिर हुने गरी छाडिएको सिरहाका एक प्रहरी अधिकृतले बताए।
उजुरी आएपछि थप कारबाही प्रक्रिया अघि बढाइने ती प्रहरीको भनाइ छ।
मध्यराति कांग्रेस र माओवादी कार्यकर्ताबीच झडपको क्रममा उनलाई प्रहरीले पक्राउ गरेको हो।
उनी निवर्तमान गाउँपालिका अध्यक्ष समेत हुन्।
औरही गाउँपालिका वडा नम्बर ४ स्थित मतदातालाई पैसा बाँड्न आएको भन्दै अध्यक्षका उम्मेदवार यादवलाई कांग्रेस र जसपाका कार्यकर्ताले घेराउ गरेका थिए। त्यसै क्रममा दुईतर्फी झडप हुँदा रड प्रहारबाट माओवादी कार्यकर्ता घाइते भएको सिरहाका डिएसपी सुवास बुढाथोकीले जानकारी दिए।
कुटाकुट भएपछि उम्मेदवार यादवसहित थप दुई जनालाई नियन्त्रणमा लिइएको उनले बताए।
झडपमा परी घाइते हुनेको नाम भने खुल्न सकेको छैन। ती युवकको टाउको फुटेपछि सिरहाकै अस्पतालमा उपचार भइरहेको छ।
