छठमा सूर्य अस्ताउँदा पनि पूजा हुन्छ, उदाउँदा पनि।
आज छठको मुख्य दिन व्रतालुहरूले नदी, पोखरी र तलाउमा उभिएर अस्ताउँदो सूर्यलाई अर्घ्य दिँदैछन्। भोलि बिहान उदाउँदो सूर्यलाई अर्घ्य दिएपछि चार दिन लामो यो पर्व समापन हुनेछ।
सूर्य र छठी माताको उपासना गरिने यस पर्वमा व्रतालुहरू परिवारको सुख, सन्तानको कल्याण, सुस्वास्थ्य र समृद्धिको कामना गर्छन्। विशेषगरी तराई–मधेसमा मनाइने छठ पछिल्लो समय अन्य क्षेत्र र समुदायमा पनि फैलिएको छ।
छठका विधि कात्तिक शुक्ल चतुर्थीबाट सुरू हुन्छन्। पहिलो दिन स्नान गरेर शुद्ध भोजन गरिन्छ। दोस्रो दिन दिनभर व्रत बसेर साँझ सखरको खिर प्रसादका रूपमा खाने चलन छ। त्यसपछि उपवास सुरू हुन्छ। तेस्रो दिन अस्ताउँदो र चौथो दिन उदाउँदो सूर्यलाई अर्घ्य दिइन्छ।
पूजाका लागि काठमाडौंका गुह्येश्वरी–गौरीघाट, कमलपोखरी, नागपोखरी लगायत स्थानमा घाट सजाइएका छन्। तराई–मधेससँगै देशका विभिन्न ठाउँका नदी र पोखरी किनारमा पनि छठको पूजा आयोजना गरिएको छ।
साँझको अर्घ्यपछि श्रद्धालुहरू रातभर जाग्राम बसेर भजनकीर्तन र छठका लोकगीत गाउँछन्।
भोलि बिहान फेरि तिनै घाटमा सूर्यको पहिलो किरण पर्खिनेछन्। उदाउँदो सूर्यलाई अर्घ्य दिएसँगै यस वर्षको छठ व्रत पूरा हुनेछ।
