त्रिभुवन अन्तराष्ट्रिय विमानस्थलबाट करिब २२ करोड रूपैयाँ बराबरको लागुऔषधसहित एक जना भारतीय नागरिक पक्राउ परेका छन्।
शनिबार थाइल्यान्डबाट काठमाडौं आएका भारतको महाराष्ट्र पुणे घर भएका ५२ वर्षीय रेवराज टिघारेलाई लागुऔषधसहित नियन्त्रणमा लिइएको प्रहरीले जनाएको छ।
उनलाई लागुऔषध नियन्त्रण ब्युरो शाखा कार्यालय त्रिभुवन अन्तराष्ट्रिय बिमानस्थल गौचरणबाट खटिएको टोलीले नियन्त्रणमा लिएको हो।
चेकजाँच गर्ने क्रममा लगेज भित्र खरायो र बिरालोको खानाको प्याकेटमा लुकाई राखेको लागुऔषध सेतो हेरोइन भेटिएको ब्युरोका प्रवक्ता दुर्गाराज रेग्मीले जानकारी दिए।
उनकाअनुसार लागुऔषध सेतो हेरोइन ५ किलो ५ ग्राम बरामद भएको छ। जसको मूल्य नेपाली बजारमा २२ करोड बराबर हो।
भारतीय नागरिक यसअघि पनि दुई पटक नेपाल आएको देखिएको छ।
सन् २०२५ नोभेम्बर ४ र २०२६ फ्रेबुअरी २६ मा लाओसबाट नेपाल आइ पहिलो पटक नेपालबाट हवाइ मार्ग र दोस्रो पटक स्थलमार्गबाट भारतसम्म लागु औषध पुर्याएको प्रहरी अनुसन्धानमा फेला परेको छ।
उनले लाओससहित जिम्बाब्बे, सुडान, बंगलादेश, भियतनाम र कम्बोडियासमेत भ्रमण गरेको देखिएको छ। अनुसन्धानका क्रममा लागु औषध कारोबारोको अन्तराष्ट्रिय सञ्जालको मुख्य व्यक्ति रहेको खुलेको एसपी रेग्मीले जानकारी दिए।
उनको साथ मेकानिकल इन्जिनियरिङको प्रमाणपत्र समेत बरामद भएको छ।
लागु औषध नियन्त्रण ऐन २०३३ बमोजिम उनीमाथि १५ वर्षदेखि जन्मकैद र ५ लाखदेखि २५ लाखसम्म जरिवाना हुने कानुनी प्रावधान रहेको छ।
-1794727902.jpg)
