आइसिसी क्रिकेट विश्वकप २०१९ को अन्तिम तीन खेल बाँकी छदा पाकिस्तान कठीन अवस्थामा थियो। अन्तिम चारमा पुग्न उसलाई सबै खेल जित्नु पर्ने बाध्यता थियो। पाकिस्तानका लागि विश्वकपका अपराजित टिम न्युजिल्यान्डविरुद्ध खेल्न चुनौतीपूर्ण थियो।
कठीन मानिएको न्युजिल्यान्डलाई बुधबार पाकिस्तानले ६ विकेटले हराउँदै सेमिफाइनल सम्भावना जीवित राख्यो। पाकिस्तान अन्तिम २ खेलअघि ७ अंक जोडेर छैटौं स्थानमा छ।
अब पाकिस्तानका लागि सेमिफाइनल पुग्न अफगानिस्तान र बंगलादेशविरुद्धको दुवै खेल जित्नु पर्ने हुन्छ। दुवै खेलमा जित हात पारेमा पाकिस्तानको ११ अंक हुनेछ।
पाकिस्तानलाई सेमिफाइनलमा पुग्न आयोजक इंग्ल्यान्डले एक खेलमा हार बेहोर्नु पर्ने समिकरण छ। ८ अंक जोडेर अंक तालिकाको चौथो स्थानमा रहेको इंग्ल्यान्डका लागि बाँकी दुवै खेल कठीन छ। उसले भारत र न्युजिल्यान्डसँग खेल्न बाँकी छ।
अर्कोतर्फ न्युजिल्यान्ड वा भारत बाँकी रहेका खेल मध्ये एक खेलमा पराजित भएमा पनि पाकिस्तानको सेमिफाइनलमा सम्भावना हुनेछ।
पछिल्ला २ खेलमा जित निकालेर सेमिफाइनल सम्भावना बनाएपछि पाकिस्तानले आलोचकको मुख बन्द गरिइदिएको छ। यस्तै पूर्व खेलाडीको पनि प्रतिक्रिया फेरिन थालेका छन्।
भारतविरुद्ध हारे बेहोरेपछि पाकिस्तानी टिमको चर्को आलोचना भएको थियो। पूर्व तीव्र गतिका बलर शोएब अख्तरले पाकिस्तानी कप्तान सर्फराज खानलाई ‘दिमाख नभएको कप्तान’ समेत भनेका थिए।
उनै अख्तरको अहिले बोली फेरिएको छ। उनले न्युजिल्यान्डलाई पराजित गरेपछि पाकिस्तानी टिमलाई ‘टाइगर’ को संज्ञा दिएका छन्।