एसिसी यु-१९ पूर्वी क्षेत्रीय क्रिकेट प्रतियोगिताअन्तर्गत चीनले नेपाललाई ५४ रनको लक्ष्य दिएको छ।
मलेसियाको किनरारा ओभलमा नेपालले टस जितेर फिल्डिङ रोजेपछि पहिले ब्याटिङ गरेको चीन २३.१ ओभरमा ५३ रनमा अलआउट भयो।
चीनका लागि ओपनरद्वय गुओहाओ गाओ र लियाङ चेनले १३-१३ रन जोडे। अन्य ब्याट्सम्यान दोहोरो अंक जोड्न नपाउँदै नेपाली बलरको सिकार भए।
चीनलाई सस्तैमा रोक्ने क्रममा नेपालका सागर ढकालले ६ विकेट लिए। उनले ९.१ ओभरमा ३ मेडन राख्दा १९ रन दिए। तिलकराज भण्डारीले ३ विकेट हात पार्दा कमलसिंह ऐरीको नाममा १ विकेट रह्यो।
समूह ए मा रहेको नेपालको समूहमा चीन र सिङ्गापुर छन्। नेपालले आफ्नो दोस्रो तथा समूह चरणको अन्तिम खेल असार २० गते सिङ्गापुरसँग खेल्नेछ।
प्रतियोगितामा यसअघि आठ टोलीले सहभागिता जनाउने भनिए तापनि प्रतियोगिता शुरु हुनु केही दिनअघिमात्रै म्यानमारले नाम फिर्ता लिएको थियो। समूह ए रहेको म्यानमारले नाम फिर्ता लिएपछि उक्त समूहमा तीन टोली मात्रै सहभागी भएका हुन्। अर्को समूहमा भने चार टोली छन्।
अर्को समूहमा आयोजक मलेशियासँगै, भूटान, हङकङ र थाइल्याण्ड रहेका छन्। समूहको शीर्ष दुई टोलीले सेमिफाइनलका लागि स्थान बनाउने छन्।
नेपालले प्रतियोगिताको उपाधि जित्ने लक्ष्य लिएको छ। विजेता टिम यु-१९ एसिया कपमा पुग्नेछ।