पाकिस्तानका तीव्र गतिका बलर मोहमद आमिरले टेस्ट क्रिकेटबाट संन्यास लिने घोषणा गरेका छन्।
२७ वर्षीय आमिरले पाकिस्तान क्रिकेट बोर्डमार्फत प्रेस विज्ञप्ती निकाल्दै शुक्रबार संन्यास लिने घोषणा गरेका हुन्।
उनले अब एकदिवसीय र टी-२० खेलमा केन्द्रित हुन चाहेको भन्दै संन्यास लिएको बताएका छन्।
साथै पाकिस्तानबाट टेस्ट खेल्न पाउनु गर्वको विषय भएको उनको भनाइ छ। उनले आगामी वर्ष हुने टी-२० विश्वकप लगायतका प्रतियोगितामा केन्द्रित हुने पनि बताएका छन्।
आमिरले पाकिस्तानका लागि ३६ टेस्टमा ११९ विकेट लिएका छन्। सन् २००९ मा १७ वर्षको उमेरमा श्रीलंकाविरुद्ध टेस्ट खेलमा डेब्यू गरेका थिए।
२०१० को इंग्ल्यान्ड भ्रमणका दौरान उनीमाथि स्पट फिक्सिङको आरोप लागेको थियो। जुन आरोप पुष्टि भएपछि उनलाई ५ वर्षको प्रतिबन्ध लगाइएको थियो। उनी सन् २०१६ को जुलाई देखि फेरि खेलमा फर्किएका थिए। त्यसयता उनले २२ टेस्ट खेलेका छन्।
हाल उनी पाकिस्तानका उत्कृष्ट तीव्र गतिका बलर हुन्।
उनले ५९ एकदिवसीय खेलमा ७७ विकेट र ४२ टी-२० खेलमा ५५ विकेट लिएका छन्।