पाकिस्तानका फास्ट बलर मोहम्मद आमिरको संन्यासले पाकिस्तानी क्रिकेट जगत अचम्ममा परेको छ। करियरको सर्वश्रेष्ठ समय चलिरहेको अवस्थामा भएको संन्यास घोषणा धेरैका लागि अनपेक्षित र अचम्ममा पार्ने किसिमको नै थियो।
उनले यस वर्ष जुनमा इङ्ल्याण्ड तथा आइतल्याण्डविरूद्ध उत्कृष्ट प्रदर्शन गरेका थिए भने विश्वकपमा पनि उनको प्रदर्शन उच्च थियो।
म्याच फिक्सिङमा ५ वर्षको प्रतिबन्ध झेलेपछि मैदान फर्किएका आमिरले गतिलो पुनरागमन गरेका थिए। यस्तोमा उनले अचानक टेस्ट क्रिकेटबाट संन्यास लिने घोषणा गरेका हुन्। यसले पाकिस्तानी क्रिकेट फ्यानहरूसँगै पूर्व खेलाडीहरूलाई समेत निराश पारेको छ।
शुक्रबार संन्यास घोषणा गरेका आमिरले सिमित ओभरका क्रिकेटमा आफ्नो ध्यान केन्द्रित गर्ने भन्दै संन्यास लिएको बताएका थिए। यस्तै उनले नयाँ युवा खेलाडीलाई मौका मिलोस् भन्नाका खातिर पनि संन्यास लिने घोषणा गरेको जनाएका थिए।
आमिरले पाकिस्तानका लागि कुल ३६ टेस्ट खेलेका छन्। उनी १७ वर्षको उमेरमा सन् २००९ मा पहिलोपटक टेस्टमा डेब्यू भएका थिए। उनले ३६ टेस्टबाट कुल ११९ विकेट लिएका छन्।
पूर्व खेलाडी वसीम अकरमले ट्विट गर्दै आमिरको संन्यासले आफू अचम्ममा परेको प्रतिक्रिया जनाएका छन्।
'मेरो लागि मोहम्मद आमिरले टेस्ट क्रिकेटबाट संन्यास लिने घोषणामा थौरै अचम्म बनाउने किसिमको छ किनकी २७-२८ को उमेरमा तपाईं आफ्नो सर्वश्रेष्ठ दिनुहुन्छ र टेस्ट क्रिकेटमा गरिएको प्रदर्शनको आधारमा नै तपाईको आँकलन गरिन्छ। यो सबैभन्दा ठूलो प्रारूप हो', अक्रमले ट्विटमा भनेका छन्।
उनले अस्ट्रेलिया विरूद्ध हुने आगामी दुई टेस्ट खेलमा र इङ्ल्याण्डमा हुने सिरिजका लागि आमिरको आवश्यक्ता रहेको बताए।
यस्तै अर्का क्रिकेटर रमीज राजाले संन्यास घोषणालाई निराशाजनक भनेका छन्।
उनले पनि ट्वीटबाट यस्तो धारणा व्यक्त गरेका हुन्।
उनी ट्वीटमा लेख्छन्, 'आमिरले २७ वर्षको उमेरमा टेस्टबाट संन्यास लिनु निराशाजनक हो। टेस्ट क्रिकेटमा राम्रो गर्ने बारेमा सोचिरहेको पाकिस्तानका लागि उनको यो निर्णय राम्रो होइन। यो समय खेल्ने थियो, पछि हट्ने थिएन।'
उता शोएब अख्तरले पनि आमिरको संन्यास घोषणाबाट आफू निराश भएको बताएका छन्। आफ्नो युट्युब च्यानलबाट यस्तो धारणा राखेका हुन्।
'आमिरको संन्यासबाट म पूरै निराश छु। यस उमेरमा खेलाडीको करियरले आफ्नो गति लिएको हुन्छ। आमिरका लागि यो समय फेरि पाकिस्तानका लागि खेल्ने थियो। पाकिस्तान खराब टेस्ट प्रदर्शनबाट गइरहेको अवस्थामा टिमलाई आमिरको एकदमै आवश्यक्ता थियो', उनले भने।
अख्तरले आफू पाकिस्तानको बोर्डमा भएको भए उनीहरूलाई टि-२० खेल्ने अनुमति नदिने पनि बताए।
'मैले घूँडामा चोट हुँदाहुँदै पनि इङ्ल्याण्ड र न्युजिल्याण्डमा पाकिस्तानलाई सिरिज जिताउने सहयोग गरेको थिएँ', उनले भने, 'यदि म पाकिस्तानको चयन बोर्डमा हुँदो हुँ त यी केटाहरूलाई टि-२० खेल्ने अनुमति दिने थिइन। यो समय तपाईंलाई पैसाको जरूरत हुन्छ तर यो समय पाकिस्तानलाई पनि तपाईं जरूरत छ।'
त्यस्तै अख्तरले यस मामिलामा बोर्डलाई हेर्न आग्रहसमेत गरेका छन्।
'म बोर्डलाई यस मामिलालाई हेर्न अनुरोध गर्छु। आमिर अहिले २७ वर्षका मात्र छन् र संन्यासले उनको मानसिक्ता दर्शाउँछ, मलाई लाग्छ पाकिस्तानी प्रधानमन्त्री इमरान खानले यो कुरा हेर्नुपर्छ', उनले भने।