अन्तर्राष्ट्रिय क्रिकेट काउन्सिल (आइसिसी) को एन्टी करप्सन युनिटका प्रमुख एलेक्स मार्सलले कोरोनाभाइरसको कारण संसारभरका क्रिकेट प्रतियोगिता रोकिएको बेला फिक्सरहरू सक्रिय भइरहेको दाबी गरेका छन्।
उनले फिक्सरहरूले क्रिकेटरसँग सोसल मिडियामार्फत सम्बन्ध बनाउन कोशिस गरिरहेको पनि बताए।
कोरोनाभाइरसका कारण मार्च १५ यता आइसिसीले मान्यता दिएका कुनै पनि क्रिकेट प्रतियोगिता संसारभर भएका छैनन्। मार्च १५ मा पाकिस्तान सुपर लिगको खेल भएको थियो।
'हामीले यो बेला फिक्सरले समय लिएको हेरिरहेका छौ। जब खेलाडीहरू सोसल मिडियामा बढि समय बिताउँछन् त्यतिबेला उनीहरुले सम्बन्ध विकास गर्न खोज्छन् अनि पछिको समयमा खेलाडीलाई प्रभावित पार्न सक्छन्,' मार्सलले गार्जियनलाई भनेका छन्।
'कोभिड-१९ ले संसारभर क्रिकेट अस्थायी रुपमा रोकिएको छ तर फिक्सरहरू अझै सक्रिय छन्।'
उनले फिक्सर सक्रिय भएको विषयमा सम्बन्धित सबैलाईब जानकारी गराएको पनि बताए।
